Endi qazan aıynda «Hárrı Potter men Fenıks alqasy» atty besinshi kitaby jarııalanbaq. Bul – Hárrı Potter serııasyndaǵy kólemi eń úlken bólim. Qazir korrektorlyq jumystar jasalyp jatyr. «Besinshi kitaptyń túpnusqasy da, aýdarmasy da 700 betten asady. Oǵan qosa, mátin kúrdelenip keledi. Keıipkerler kóbeıdi, balalar ósti, oqıǵa shıelenisti. Sol sebepti jumys kúrdeli júrip jatyr. Tırajy 5 000 dana», deıdi jobanyń jaýapty redaktory Nazgúl Qojabek.
Jalpy, Hárrı Potter serııasyn túgel aýdarǵandar – Dınara Mázen men Saıat Muhamedııar. Joan Roýlıń osy roman jelileri arqyly álemdegi eń baı jazýshylardyń qataryna qosyldy. 1997 jyldyń 26 maýsymynda jaryqqa shyqqan alǵashqy «Hárrı Potter men pálsapa tas» romany balalar ádebıeti janryn buzyp-jara kirip, búkil álemde zor kommersııalyq tabysqa keneldi. Búginge deıin jeti serııaly roman 500 mıllıon danamen shyǵyp, 80 tilge aýdarylyp, álemdik ádebı bestsellerge aınaldy. Máselen, 2007 jyly jaryqqa shyqqan bir ǵana «Hárrı Potter men ajal syıy» kitaby birden 11 mıllıon danamen shyǵarylyp, rekord ornatqanyn da bilemiz.
Warner Bros. Pictures kompanııasynyń jetekshiligimen romandar serııasy kınoǵa aınalyp, kınematografııa salasynda da tabysqa jetti. Kitap kótergen abyroı-ataq álemde Harry Potter brendin qalyptastyryp, ol brendtiń quny, shamamen 12.78 mıllıard dollarǵa baǵalanady.
Baspa basshysy Raısa Qadyr bir suhbatynda: «Romandar jelisiniń eń sońǵysy 2007 jyly jaryqqa shyqqan. Keıde nelikten sol tusta birden qazaq tiline aýdarylyp otyrmaǵan dep tańǵalamyn. Biraq qazir de kesh emes. О́ıtkeni klassıkanyń aty qaı kezde de klassıka», deıdi. Arada kóp jyl ótse de álemdik bestsellerdiń qazaq tilinde sóıleýi – úlken nátıje. Qazaq oqyrmany Hárrı Potterdiń besinshi kitabyn asyǵa kútedi.
