Keshe Aqordada Memleket basshysy Nursultan Nazarbaevtyń «Qazaqstan joly–2050: bir maqsat, bir múdde, bir bolashaq» atty Qazaqstan halqyna Joldaýynyń negizgi basymdyqtaryn túsindirý jónindegi respýblıkalyq keńestiń otyrysy ótti.
Keshe Aqordada Memleket basshysy Nursultan Nazarbaevtyń «Qazaqstan joly–2050: bir maqsat, bir múdde, bir bolashaq» atty Qazaqstan halqyna Joldaýynyń negizgi basymdyqtaryn túsindirý jónindegi respýblıkalyq keńestiń otyrysy ótti.
Oǵan Qazaqstan Prezıdenti Ákimshiliginiń, Úkimettiń, Premer-Mınıstr Keńsesiniń, Parlament Senaty men Májilisi apparattarynyń, «Nur Otan» partııasy ortalyq apparatynyń ókilderi, mınıstrlikter men vedomstvolardyń jaýapty hatshylary men mınıstrlerdiń orynbasarlary, Astana, Almaty qalalary ákimderi men oblystar ákimderiniń orynbasarlary men ishki saıasat basqarmalarynyń basshylary, ulttyq JOO-lar men qoǵamdyq birlestikter, zertteý ınstıtýttarynyń, BAQ-tardyń basshylary qatysty.
Keńes otyrysyn ashqan Qazaqstan Prezıdenti Ákimshiligi Basshysynyń orynbasary B.Maılybaev bul jıynda Elbasy Joldaýyn iske asyrý aıasyndaǵy respýblıka aýmaǵynda atqarylatyn aqparattyq-nasıhat jumystarynyń basym baǵyttary talqylanatynyna toqtaldy. Máselen, ol: «Osydan 10 kún buryn Elbasy N.Nazarbaev Qazaqstan halqyna Joldaýyn jarııalady. Joldaýdyń negizgi ereksheligi – Elbasy qazaqstandyqtardyń eń basty saýalyna jaýap berdi, Máńgilik El – Qazaqstan halqynyń Ulttyq ıdeıasy ekenin málimdedi. Halyq Máńgilik Eldi júregine óte jaqyn, jyly qabyldady. Mine, sondyqtan bul ıdeıany árbir azamattyń sanasyna sińirýge tıispiz. Ony árbir otandastyń basty qundylyǵy etýimiz kerek. Ulttyq ıdeıanyń tóńiregine toptasyp, «Qazaqstan-2050» Strategııasynyń maqsattaryna umtylamyz. Elbasy aıtqandaı, «Qazaqstan-2050» Máńgilik Elge bastaıtyn eń abyroıly, eń mártebeli jol. Bıylǵy Joldaý «Qazaqstan-2050» Strategııasynyń bıik maqsattaryna bastaıtyn alǵashqy saty», deı kele, Memleket basshysynyń tapsyrmasy boıynsha, Qazaqstannyń álemdegi asa damyǵan 30 eldiń qataryna qosylý tujyrymdamasy daıyndalǵanyn, demek, ári qaraıǵy áreketter Joldaý men tujyrymdama aıasynda órbıtinin atap ótti.
Sondaı-aq, B.Maılybaev Elbasynyń Úkimetke naqty tapsyrmalar júktegenin, ol tapsyrmalar Prezıdent Ákimshiliginiń tikeleı baqylaýynda ekenin, sol sebepti árbir tapsyrmanyń muqııat jáne ýaqtyly oryndalýy mańyzdy ekenin jetkizdi. «Elbasynyń Joldaýyn nasıhattaý baǵytynda qazir de birqatar sharalar atqaryldy. Birinshiden, Joldaýdy júzege asyrý jónindegi Jalpyulttyq jospar bekitildi. Ekinshiden, Joldaýdy aqparattyq qoldaýdyń arnaıy Is-sharalar jospary jasaldy. Úshinshiden, 2014 jylǵa arnalǵan aqparattyq strategııanyń jobasy daıyn»,– dedi Baǵlan Asaýbaıuly.
Ol óz sózinde búginde aqparattyq-nasıhattyq jumystardyń ortaq algorıtmi jasalǵanyn, ol jumystarǵa 16 respýblıkalyq, 3 myńnan astam óńirlik aqparattyq top qatystyrylǵanyn atap ótti. «Buǵan qosa, 3 aqparattyq tolqyn uıymdastyrylatyn bolady. Birinshi aqparattyq tolqyn bıylǵy jyldyń 1 naýryzyna deıin júzege asyrylady. Bul jumystar qazirdiń ózinde bastalyp ketti. Onyń negizinde tanysý jumystary jatyr. Ekinshi tolqyn 1 naýryz ben 1 qyrkúıek aralyǵyn qamtıdy. Bul kezeń Joldaýdyń árbir basymdyǵyn júzege asyrý jónindegi aqparattyq-nasıhattyq jumystarǵa arnalýy tıis. Al úshinshi tolqyn 1 qyrkúıekte bastalyp, jyldyń aıaǵyna deıin jalǵasady. Bul kezeńde Elbasy Joldaýynda aıtylǵan maqsat-mindetterdi júzege asyrý jumystary qalaı júrgizilgendigi týraly jyldyq esep qorytyndylanady», dedi B.Maılybaev.
Keńes barysynda «Nur Otan» partııasy Tóraǵasynyń birinshi orynbasary B.Baıbek, Qazaqstan Prezıdenti janyndaǵy Ortalyq kommýnıkasııalar qyzmetiniń dırektory E.Babaqumarov, Bilim jáne ǵylym mınıstri A.Sárinjipov, Eńbek jáne halyqty áleýmettik qorǵaý mınıstri T.Dúısenova, Almaty qalasy ákiminiń orynbasary Z.Amanjolova sóz sóıledi.
Keńes qorytyndysy boıynsha qatysýshylarǵa naqty tapsyrmalar men usynymdamalar berildi.
Láıla EDILQYZY,
«Egemen Qazaqstan».
––––––––––––––
Sýretti túsirgen
Igor BÝRGANDINOV.
