Álem • 08 Qyrkúıek, 2021

11 qyrkúıektegi lańkestiktiń eki qurbany 20 jyldan keıin anyqtaldy

2001 jyldyń 11 qyrkúıeginde oryn alǵan Nıý-Iorktegi shabýylda qaza tapqan taǵy eki qurbannyń súıegi 20 jyl ótken soń tabyldy, dep habarlaıdy Egemen.kz Daily Mail-ge silteme jasap.

Botakóz BAQBERGEN

Medısınalyq sarapshylar Nıý-Iorktegi Hempsted qalasynan Dorotı Morgannyń qaldyqtaryn anyqtady. Ol 2 753 adamnyń ómirin qıǵan apattan keıin qalpyna keltirilgen belgisiz qaldyqtardyń DNQ-syn únemi tekserilip otyrǵan 1646-shy qurban boldy,

1647-shi qurban atanǵan ekinshi adamnyń aty týystarynyń ótinishi boıynsha jarııalanbaǵan. Onyń jeke basyn 2001, 2002 jáne 2006 jyldary tabylǵan qaldyqtar rastady.

«20 jyl buryn biz Dúnıejúzilik saýda ortalyǵynda qaıtys bolǵandardyń otbasylaryna olardyń týystarynyń qaldyqtaryn anyqtaý úshin qoldan kelgenniń bárin jasaımyz dep ýáde berdik. Biz qasıetti paryzymyzdy oryndaýdy jalǵastyrýdamyz. 2001 jyldyń 11 qyrkúıeginen bastap qansha ýaqyt ótse de barlyq joǵalǵan adamdar otbasylarymen qaıta qaýyshýy múmkin ekenine kóz jetkizý úshin qolymyzdaǵy barlyq quraldardy qoldanýǵa mindettimiz», dedi Nıý-Iork qalasynyń bas sot sarapshysy doktor Barbara A.Sempson.

Nıý-Iorktiń bas medısınalyq sarapshysy Keńsesiniń málimetinshe, Dúnıejúzilik saýda ortalyǵynyń shabýyl qurbandaryn anyqtaýǵa baǵyttalǵan kóp jyldyq kúsh-jiger AQSh tarıhyndaǵy eń úlken jáne eń kúrdeli sot tergeýi bolyp sanalady.

11 qyrkúıektegi Dúnıejúzilik saýda ortalyǵyna shabýyldyń qurbandary 2 753 adam boldy, osy shabýyldardan zardap shekkenderdiń sany 1 647 adamdy quraıdy, qaıtys bolǵandardyń shamamen 40 paıyzy nemese 1 106 adam áli anyqtalǵan joq.

Eske sala ketsek, 2001 jyldyń 11 qyrkúıeginde 19 terrorıstten turatyn top AQSh-ta tórt jolaýshylar ushaǵyn basyp aldy, olardyń ekeýi keıinnen Nıý-Iorktegi Dúnıejúzilik saýda ortalyǵynyń bıik munaralaryna qulady. Taǵy bireýi Amerıka astanasynyń janyndaǵy Pentagon ǵımaratyn qaǵyp ketti, al tórtinshisi jolaýshylar men ekıpaj terrorısterdi beıtaraptandyrýǵa tyrysqannan keıin Pensılvanııadaǵy Shanksvıll qalasynyń janynda qulady.

Terrorıstik shabýyldar úshin jaýapkershilikti Qazaqstanda tyıym salynǵan «Al-Kaıda» terrorıstik uıymy óz moınyna aldy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz