Otyrysta bilim jáne ǵylym mınıstri Ashat Aımaǵambetovtiń Shetelde kadrlar daıarlaý jónindegi respýblıkalyq komıssııasy hattamalyq tapsyrmalarynyń oryndalýy týraly esebi tyńdaldy. Sondaı-aq «Bolashaq» halyqaralyq stıpendııasyn iske asyrýǵa qatysty birqatar máseleler qaraldy.
Komıssııa sheshimimen «Bolashaq» halyqaralyq stıpendııasy magıstratýra, doktorantýra, rezındentýra boıynsha oqıtyn, sondaı-aq álemniń jetekshi ǵylymı jáne óndiristik ortalyqtaryna taǵylymdamadan ótýge jiberiletin 196 úmitkerge taǵaıyndaldy.
Aıta ketý kerek, stıpendıattar álemniń 16 eliniń jetekshi bilim oshaqtarynda, sonyń ishinde AQSh (Garvard ýnıversıteti, Kolýmbııa ýnıversıteti, Massachýsets tehnologııalyq ınstıtýty), Kanada (Toronto ýnıversıteti), Ulybrıtanııa (London ekonomıka jáne saıasattaný mektebi, London Imperııalyq kolledji, Londonnyń Koroldik kolledji), Japonııada (Tokıo ýnıversıteti) t.b. bilim alatyn bolady.
Sondaı-aq stıpendıattar qazirgi ýaqytqa asa qajetti qashyqtan oqytý metodıkasy, joǵary bilim berýdegi strategııalyq menedjment jáne kóshbasshylyq, ýnıversıtetti basqarý, ınklıýzıvti bilim berý; medısınalyq genetıka, vırýsologııa, ınfeksııalyq aýrýlar, epıdemıologııa, bıotehnologııa, bıomedısına; ınnovasııalyq menedjment, sıfrlyq ekonomıka, jasandy ıntellekt, munaı-gaz ınjınırıng, avıasııa jáne aeroǵarysh tehnıkasy, atom óndirisi, IT, kólik tehnologııasy, mashınaqurastyrý, t.b. mamandyqtar boıynsha bilim alady.
2021 jyly «Bolashaq» baǵdarlamasy boıynsha oqýǵa 1055 stıpendııa bólindi. Onyń ishinde 555 stıpendııa magıstratýra, rezıdentýra, doktorantýra jáne taǵylymdama baǵdarlamalary boıynsha bólingen. Qosymsha 500 stıpendııa taǵylymdamanyń «ǵalymdar» jańa sanaty boıynsha berildi. Bul sanat Prezıdent Qasym-Jomart Toqaevtyń tapsyrmasyna sáıkes, álemniń jetekshi ǵylymı ortalyqtarynda jyl saıyn 500 ǵalymnyń taǵylymdamadan ótýin qamtamasyz etý maqsatynda bekitilgen.
«Bolashaq» halyqaralyq stıpendııasyn taǵaıyndaý konkýrsyna qatysý úshin qujattardy qabyldaý osy jylǵy 4 mamyrdan 28 qazanǵa deıin jalǵasady.
Otyrys qorytyndysy boıynsha Qyrymbek Kósherbaev birqatar naqty tapsyrmalar berdi. Onyń ishinde «Bolashaq» baǵdarlamasy stıpendıattarynyń oqý jáne eńbekpen óteý barysyn baqylaý jáne qadaǵalaýdy kúsheıtý máselesine basa nazar aýdardy.
«Bolashaq» halyqaralyq stıpendııasy ıegerleriniń tizimi Halyqaralyq baǵdarlamalar Ortalyǵynyń resmı saıtynda jarııalandy.
