Jerlesterimizge óz tobynan irkilmeı shyǵý aıtarlyqtaı qıyndyq týǵyzbaıdy degen oıdamyz. О́ıtkeni Qazaqstan quramasynyń ózge komandalarǵa qaraǵanda halyqaralyq arenada qol jetkizgen tabysy áldeqaıda qomaqty. Bálkim, Lıtva men Kosta-Rıka biraz tiresýi múmkin. Baltyq jaǵalaýy ókilderi buǵan deıin pálendeı belesterdi baǵyndyrmaǵanymen, jarys qojaıyndary retinde óz kórermenderiniń kóz aldynda jandaryn salyp aıqasatyny anyq. Kosta-Rıka – óz qurlyǵyndaǵy bedeli bar komandalardyń biri. Olar 2000 jyly KONKAKAF birinshiliginiń jeńimpazy atansa, 2004 jyly qola medaldy ıelendi. Álem chempıonatynda tórt ret óner kórsetip, 2016 jyly 1/8 fınalǵa deıin jetti. Al Venesýela quramasynda ondaı tabystyń birde-biri joq.
Qazaqstan úshin bul – úshinshi álem chempıonaty. Alǵashynda biz Azııa qurlyǵyndaǵy irikteý synynan súrinbeı ótip, 2000 jyly Gvatemalada ótken álemdik dodaǵa qatystyq. Bul sapar bizder úshin sátsiz aıaqtaldy. Tusaýkeser kezdesýde Brazılııa tas-talqanymyzdy shyǵardy – 1:12. Odan keıin alań ıelerine ese jiberdik – 5:6. Sońǵy oıynda Portýgalııadan oısyraı utyldyq – 2:6. Desek te bul nátıjege bola qazaqstandyq jankúıerler qatty kúıine qoıǵan joq. Sebebi ol kezderi elimizde fýtzal endi-endi ǵana eńse tiktep kele jatqan. Ǵasyrlar toǵysynda jasaqtalǵan komanda sapynda kileń óz órenderimiz oınady. Sondyqtan da asa mańyzdy jarysqa joldama alýdyń ózi úlken jetistik sanaldy.
Qazaqstan quramasy ekinshi ret 2016 jyly Kolýmbııada shymyldyǵy túrilgen jarysqa qatysty. Ol kezde ÝEFA-ǵa ótkenbiz. Alǵashqy aınalymda Argentınaǵa tap keldik. Amerıka kýbogynda 10 ret (2 altyn+5 kúmis+3 qola) jeńis tuǵyryna kóterilgen komandamen teń dárejede oınadyq. Alaıda 20-mınýtta Alamıro Vaporakı soqqan jalǵyz gol báseke taǵdyryn sheshti – 0:1. Bir aıta keterligi, sol jyly argentınalyqtar álem chempıony atandy. Kelesi aınalymda Kosta-Rıkamen kúsh synastyq. Bul joly aıtýly jarys tarıhyndaǵy alǵashqy jeńisimizge qol jetkizdik. Dýglas, Tako jáne Leo soqqan úsh dopqa qarsylastar komandasy bir ǵana golmen jaýap bere aldy – 3:1. Odan keıin Solomon araldaryn san soqtyrdyq. Bul báseke 10:0 esebimen aıaqtaldy.
Jerlesterimizge pleı-off kezeńiniń alǵashqy aınalymynda Ispanııa quramasymen kúsh synasýǵa týra keldi. Eki dúrkin álem chempıony, úsh dúrkin vıse-chempıon jáne bir márte qola júldeger degen dardaı ataǵy bar azýly qarsylasqa bizdiń jigitterdiń áli jetpedi. Kórermender kóńilinen shyqqan tartysty oıyn 5:2 esebimen ıspanııalyqtardyń paıdasyna sheshildi. Jerlesterimizdiń arasynan Shyńǵys Esenamanov pen Dáýren Nurǵojın nysanany dál kózdedi.
Mine, endi álemdik dop dodasyna Qazaqstannyń fýtzalshylary úshinshi márte qatysqaly otyr. Ulttyq komandamyzdyń bas bapkeri Rıkardo Kaka Baltyq jaǵalaýyndaǵy jarysta myna shákirtterine senim artyp otyr: Qaqpashylar – Igıta («Qaırat») men Raýan Atantaev («Atyraý»). Qaptaldaǵy oıynshylar – Taınan («El-Poso», Ispanııa), Dýglas, Dáýren Nurǵojın, Shyńǵys Esenamanov, Albert Akbalıkov, Birjan Orazov, Dáýren Tursaǵulov («Qaırat»), Azat Valıýllın («Ýhta», Reseı), Arnold Knaýb, Nurbek Qaraǵulov («Aqtóbe»), Bolat Sarbasov, Jomart Toqaev («Atyraý»), Tórehan Dosov («Báıterek») jáne Aqedil Madııarov («Lıpesk», Reseı).
Sondaı-aq toptyq týrnırlerde myna komandalar ózara kúsh synasady: V toby – О́zbekstan, Gvatemala, Reseı jáne Mysyr. S toby – Taıland, Portýgalııa, Marokko jáne Solomon araldary. D toby – Panama, Chehııa, Vetnam jáne Brazılııa. E toby – Angola, Japonııa, Paragvaı jáne Ispanııa. F toby – Argentına, AQSh, Serbııa jáne Iran. Lıtvadaǵy dop dodasy Vılnıýstegi «Sımens Arena» (10 myń kórermenge eseptelgen) men Kaýnastaǵy «Jalgırıs Arenada» (13 807) jáne Klaıpedadaǵy «Shvıtýre Arenada»
(6 200) ótedi.
Jarystyń basty favorıtteri retinde Brazılııa, Ispanııa jáne Argentına quramalary sanalady. Bul boljam negizsiz emes. Eger ótkenge zer salsaq, fýtzaldan álem chempıonaty nebári segiz márte ǵana uıymdastyrylǵanyn baıqaımyz. Osy jarystarda brazılııalyqtar bes ret (1989, 1992, 1996, 2008, 2012 jyldary) bas júldeni oljalasa, ıspanııalyqtar eki ret (2000, 2004 jyldary) dara shyqty. Taǵy bir altyn medal (2016 jyly) argentınalyqtarǵa buıyrdy. Olardyń basty qarsylastary retinde Italııa men Reseı atalýda. О́z tarıhynda Apennın túbeginiń túlekteri úsh ret (2004 jyly – kúmis, 2008 jáne 2012 jyldary – qola) júldegerler qatarynan kórinse, kórshilerimiz aıtýly dodada eki márte (1996 jyly – qola, 2006 jyly qola) úshinshi orynnan kórindi. Sondaı-aq sońǵy básekede qola medaldy qorjynǵa salǵan Ispanııa fýtzalshylarynyń da áleýeti joǵary baǵalanýda. Al biz, árıne, Qazaqstan quramasyna úlken úmitpen qaraımyz.
