Qaraǵandy haıýanattar baǵynyń aınalasynda taǵy da janjal shyqty. Bul joly kelýshiler múıizi kesilip, qansyraǵan buǵylardyń sýreti men vıdeosyn jarııalady. Ol áleýmettik jelilerde taralyp, rezonans týdyrdy.
Jeli qoldanýshylarynyń pikiri ekige bólingen. Biri janýarlar jaǵdaıyna alańdaıtynyn aıtyp ashýlansa, al bireýleri haıýanattar baǵynyń ákimshiligin qoldaǵan.
«Janýarlar las jerde qansyrap jatyr. Olar ınfeksııa juqtyrmas úshin múıizin tańýdy da oılamaǵan. Osyny istegenderdi aýrýhanada osylaı emdese ǵoı. Haıýanattar baǵy emes, janýarlardy azaptaıtyn oryn ǵoı myna jer», dep jazdy jeli qoldanýshylary.
«Nege sonsha saýatsyzsyńdar? Janýarlar narkozdan keıin álsirep jatqanyn qarapaıym kózben kórýge bolady. Múıizderi bir-birine zaqym keltirmes úshin kesiledi, óıtkeni qazir olarda rýtıng maýsymy bastaldy. Sondyqtan bárin qaýipsizdik úshin jasaıdy. Pikir jazar aldynda nege bulaı jasaǵandaryn oqysańdarshy», dep jazady basqa jeli qoldanýshysy.
Qaraǵandydaǵy haıýanattar baǵy mán-jaıdy túsindirip, pikir bildirdi. Saıabaqtyń zootehnıgi buǵynyń múıizin kesý prosedýrasy jyl saıyn kúzde janýarlardyń qaýipsizdigi úshin jasalatynyn aıtty.
«Kúzde buǵylar agressıvti bola bastaıdy. Kóbinese bundaı jaǵdaıda urǵashy buǵylar zardap shegedi. Janýarlar bir-birin jaryp jibergen kezder de bolǵan. Sondyqtan mundaı jaǵdaılar qaıtalanbas úshin jyl saıyn múıizderin kesýge májbúrmiz. Bul joly haıýanattar baǵyna kelýshiler túsirgen úsh buǵynyń múıizi kesilgen. Sýret jáne vıdeo túsirgen kezde janýarlar áli de aýyrsynýdy basatyn dáriler áserinde bolǵan. Sondyqtan olar óte álsiz bolyp kórinedi. Qazir olardyń jaǵdaıy qalypty. Olardyń múıizi qanmen qorektenedi, al keskennen keıin tabıǵı túrde aǵyp ketedi», dedi haıýanattar baǵynyń qyzmetkeri.
