«Pavlodar oblysynyń aýmaǵynda quramyna 10 adam kirgen uıymdasqan qylmystyq top ustaldy. Top músheleriniń óz rólderi bolǵan: óz barymtashylary, satýshylary, qajetti qujattardy jınaýmen aınalysatyndar, sondaı-aq mal dárigerler bolǵan. Qylmystyq top mal urlap, ony soıyp satýmen aınalysqan», dedi Pavlodar oblystyq polısııa departamentiniń bastyǵy Nurlan Másimov.
«Kúdiktiler Ekibastuz qalasynda urlyq ústinde ustaldy. «VAZ 21099» avtokóligin tekserý kezinde bir sıyr eti, metall elektrondyq tarazy tárkilendi, al «Audi» kóliginen veterınarlyq anyqtama tabyldy», dedi polısııa departamentinen.
«Qaskúnem mynadaı shemamen jumys istegen: aptasyna bir ret demalysqa qaraı Ekibastuzdaǵy iri sharýa qojalyǵynan 2 bas iri qara mal urlap, demalys kúnderi qala bazarlarynda jáne úıinde soıyp satyp otyrǵan. Kúdiktiler buǵan deıin et ónimderin satýmen aınalysqan, turaqty klıentteri bar. Sondyqtan, qala turǵyndary odan kúdiktenbegen», dedi Nurlan Másimov.
Quqyq qorǵaý organdary sotqa deıingi tergeýdi bastady. Polıseılerdiń aıtýynsha, ustalýshylar Ekibastuz qalalyq ýaqytsha ustaý oqshaýlaǵyshyna qamaldy. Sotqa deıingi tergeý barysynda kúdiktilerdiń basqa da osy syndy qylmystarǵa qatysynyń bar-joǵy anyqtalyp jatyr.
