Sport • 12 Qyrkúıek, 2021

Kókbórilerdiń qyrkúıektegi «qaqtyǵysy»

133 ret kórsetildi

Qyrkúıek aıynyń sońǵy aptasynda álemniń ár qıyrynda aralas jekpe-jekten iri halyqaralyq týrnırler ótedi. Sol jarystardyń keıbirin qazaqstandyq jankúıerler taǵatsyzdana kútýde. Sebebi aıtýly básekelerde bizdiń eldiń órenderi de óner kórsetedi. Oktagonǵa shyǵatyndar arasynda Qýat Hamıtov, Asyljan Baqytjanuly, Nursulan Qasymhanov, Qarshyǵa Dáýitbek jáne taǵy basqalar bar.

24 qyrkúıekte Máskeýde ASA 129 týrnıri ótedi. Sol jarys­ta Qazaq­stan­nyń úsh birdeı óreni óner kórsetedi. Úsheýi de Al­matyda irgetasy qalanǵan Danııar Qasqaraýov jetekshilik etetin «Alash Praıd» klýbynyń múshesi. Tar­­qatyp aıtsaq, 93 kılo salmaqta ASA reı­tınginde tórtinshi orynda tur­ǵan Asyljan Baqytjan­uly «Saq» bra­zılııalyq Leonardo Sılvamen aıqasady. Jalpy, aýyr salmaqtarda synǵa túsip júrgen qazaqstandyq sportshylar tym sırek. Sol sebepti de barsha Alash jurty Asyljanǵa zor úmit artyp otyr. Osy kúnge deıin oktagonǵa 12 márte shyqqan 31 jastaǵy qazaqtyń qaısar uly 11 básekeni óz paıdasyna sheshti. Toǵyz qar­sylasyn esinen tandyrdy. Sońǵy ret ol osydan týra bir jyl buryn Reseıdiń astanasynda ataqty Alekseı Býtorınnen utylǵan edi. Endi qaıta eńse tikteý qajet. Baqytjanulynyń bul jolǵy qarsylasy da myqty. Segiz jyldan asa osy sport túrin serik etken 29 jastaǵy Ońtústik Amerıkanyń ókili 22 kezdesý ótkizip, 17 ret jeńiske jetken.

Máskeýdegi týrnırde kóp­te­gen jan­kúıerdiń nazary 66 kılo salmaqtaǵy qazaqtyń uly Nursultan Qasymhanov pen ha­ba­rovskilik Alekseı Pol­pýd­nı­­kov arasyndaǵy aıqasqa aýaty­ny sózsiz. Sebebi dál osy sport­shy kezinde bizdiń Arman Ospa­nov­pen úsh márte kezdesip, eki ret san soqtyryp ketti. Sonaý 2013 jyly Sochıde qandasymyz ony bir mınýtqa jetkizbeı uryp jyqsa, 2017 jáne 2019 jyldary Máskeýde uıymdastyrylǵan básekelerde Polpýdnıkov ketken ese­sin qaıtardy. Iá, 28 jastaǵy Reseı sport­shysynyń óte myqty ekeni esh kú­mán týǵyzbaıdy. 10 jyldan asa ýaqyt ara­lyǵynda aıqas alańyna 38 márte shyq­qan ol 29 ret jeńiske jetti. 21 básekeni merziminen buryn aıaq­tady. Desek te 29 jastaǵy Nur­sultan da ońaılyqpen ese jibe­re qoıatyndardyń qatarynan emes. Onyń rekordy – 11 jeńis jáne 3 jeńilis. Biraz jyldan beri Qasymhanovtyń qada­myn jiti qadaǵalap júrgen jaıymyz bar. Jetisý jolbarysynyń eń basty qasıeti – «ólispeı, be­ris­peı­di». Osy joly Nursul­tan qar­sylasynyń aýzy-murnyn Qıyr Shyǵysqa qaratady dep úmit­tenemiz.

ASA týrnırinde joǵaryda esimi atalǵan qos qandasymyz­dan bólek, Qar­shyǵa Dáýitbek (9-3) baq synaıdy. 66 kılo sal­maq dárejesinde óner kórsetip júr­gen ol Tájikstannyń tarlany Fat­hıdın So­bırovpen (15-4-1) saıysqa túsedi.

Dál sol kúni Reseıdiń Sochı qalasynda AMC Fight Nights týr­nıri ótip, qazaqtyń qos qyrany óz ónerlerin ortaǵa salady. So­lar­dyń arasynan Qýat Hamıtov pen Marıf Pıraevtyń arasynda­ǵy jekpe-jekti kórermender ta­ǵat­syzdana kútý­de. «Naıman» degen búrkenshik esimmen tanylǵan jerlesimiz 28 jekpe-jeginiń ­21-in jeńispen aıaqtady. 17 básekede aıqyn basymdyqqa ıe boldy. Mar­ıf Qýattan bes jas kishi. Desek te «Pıranıa» atan­ǵan Da­ǵystannyń týmasy kúni bú­ginge deıin 31 ret oktagonǵa shyǵyp úl­gerdi. 26 básekede mereıi ústem bolyp, 11 qarsy­lasyn nokaýtqa jiberdi. Kezinde Pıraev Igor Svırıd pen Georgıı Kı­chıgın syn­dy qazaqstandyq sportshy­lar­dy sabap tastaǵan. Qara teńiz jaǵa­­laýynda Qýat Hamıtovpen birge Nurbek Qabdrahmanov ta kúsh synasady. Onyń qarsylasy – krasnodarlyq Azamat Achmız.

26 qyrkúıekte Dáýren Erme­kovke (14-5) jankúıer bolamyz. Grýzııanyń bas shahary – Tbılısı­de ótetin Eagle FC týrnırinde ol jeńilistiń kermek dámin tatyp kór­megen daǵystandyq Nýsalhan Ýmahanovpen (7-0) sheberlik baı­qasady.

28 qyrkúıekte AQSh-tyń Las-Vegas qalasynda álemdegi eń bel­di promoýshen – UFC óziniń kezek­ti jarysyn ótkizýdi josparlap otyr. Qazaqstannyń taǵy bir óki­li osy dúbirli dodada kúsh synasý qurmetine ıe boldy. Ol – Nıkolaı Veretennıkov. 31 jastaǵy otan­dasymyz 12 jekpe-jeginiń tek úsheýinde utyldy. Sońǵy segiz kez­desýiniń barlyǵynda onyń mereıi ústem boldy. Biraq Vereten­nı­kovtiń qarsylasy da myqty. 21 jas­­taǵy ekvadorlyq Maıkl Mora­les óziniń 11 básekesiniń bar­lyǵynda jeńiske jetip, 10 qarsy­lasyn esinen tandyrdy.

 

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar