Áleýmettik jelide 20 jastaǵy jigittiń óz-ózine qol jumsaǵany týraly habarlama paıda boldy.
Qaıǵyly oqıǵa 11 qyrkúıekte bolǵan. Keshke dostarymen birge júrgende, ol basqa toptyń jigitimen janjaldasyp, biraz sóılesken soń tarap ketken. Alaıda, bul jaǵdaı qarsylastyń dostaryna unamaı, olar Álisherdi qýyp jetip, jabylyp aıaýsyz uryp tastaǵan. Qazir jigittiń týystary men jaqyndary ádilettilikti talap etedi jáne ulyn aıaýsyz urǵandarǵa qatysty tıisti jaza qoldanǵanyn qalaıdy.
Týystarynyń aıtýynsha, dál osy oqıǵa Álisherdiń sýısıdke barýyna sebep bolǵan.
«Álisherimizdiń ózine qol jumsaýyna qatygez jábirleýshiler sebepker boldy. Ol myqty adam bolǵan jáne biz onyń ómir súrgisi kelmeıtinin eshqashan estigen emespiz», delingen habarlamada.
Marqumnyń týǵandarynyń aıtýynsha, olar osy fakti boıynsha Abaı qalasynyń polısııa bólimine júgingen.
«Sol kúni atalǵan fakt boıynsha QR QK 105-baby 1-bóligi boıynsha qylmystyq is tirkeldi. Ol boıynsha tıisti saraptamalar taǵaıyndaldy.
Qazirgi ýaqytta tergeý júrip jatyr», dedi Qaraǵandy oblysy PD baspasóz qyzmeti.
