Árıne, bul iske deıin polısııa qyzmetkerleri onyń sońyna túsip, jedel is-sharalar júrgizgen. Biraq qylmysty qoldan ustaý úshin kúdiktini uzaq ýaqyt ańdýǵa týra kelgen. Aqyrynda polıseıler úshin operasııa sátti aıaqtalyp, kúdikti 2 kg gashısh ótkizgeli jatqan jerinde qylmys ústinde ustaldy.
Gashısh – qarasoranyń jabysqaq japyraqtaryn untaqtap, brıkettelip jasalynǵan esirtkiniń daıyn túri. Ol qatty nemese untaq túrinde de bolady. 2 kg gashıshtiń qara bazardaǵy baǵasy óte qymbat, sondyqtan myna kúdiktiniń qylmysy Qylmystyq kodekstiń «Esirtki zattary, olardyń tektesteri men prekýrsorlarynyń jıyntyq kestesine» sáıkes asa iri kólemge jatady. Atalǵan fakti Qylmystyq kodekstiń 297-babynyń 3-bóligi: «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha Sotqa deıingi tergep-tekserýlerdiń biryńǵaı tizilimine engizildi. Kúdiktige qatysty qamaqqa alý túrindegi shara taǵaıyndaldy.
– Baptyń sanksııasyna sáıkes kúdikti osy qylmysy úshin 15 jylǵa deıingi merzimge bas bostandyǵynan aıyrylýy múmkin. Esirtkini ótkizgeni úshin zańnamada qatań jaýapkershilik kózdelgen. Jyl basynan beri oblysta barlyǵy 139 esirtki qylmysy, onyń ishinde 35 ótkizý faktisi anyqtaldy. 287 kıloǵa jýyq túrli esirtki zattary, onyń ishinde 4 kg 130 gr-nan astam sıntetıkalyq esirtki tárkilendi, – deıdi Soltústik Qazaqstan oblystyq PD Esirtki qylmysyna qarsy is-qımyl basqarmasy bastyǵy, polısııa polkovnıgi Jandos Basybaev.
Soltústik Qazaqstan oblysy
