Qazaq Air-dyń habarlaýynsha, qaıǵyly oqıǵa 14 qyrkúıekte oryn alǵan.
Ushý kezinde ushaq ekıpajyna salondaǵy jolaýshynyń biri naýqastyń ózin jaısyz sezinip, shuǵyl kómekke muqtaj ekendigi týraly aqparat tústi. Bortserik jolaýshyǵa jaqyndap kelgende onyń esinen tanǵanyn kórgen, al tamyryn ustaǵanda eshqandaı tirshilik belgisi bilinbegen, tynystap ta jatpaǵan. Bas ushqyshqa esep berilip, ol jolaýshylardan kómek surady. Jolaýshylar arasynda dáriger bar bolyp shyqty.
«Borttaǵy medısınalyq kómek jónindegi nusqaýlyqqa sáıkes, aǵa bortserikpen birge dáriger júrek-ókpe reanımasııasyn jasady», deıdi áýe kompanııanyń baspasóz qyzmeti
Áýe kompanııanyń habarlaýynsha, ushaq komandıri jaqyn mańdaǵy áýejaıǵa shuǵyl qoný týraly sheshim qabyldady.
«Áýe qozǵalysynyń baǵyty ózgergeni týraly dıspetcherlerge ekıpaj eskertip, ushaqta bolǵan jaıdy egjeı-tegjeıli baıandady, jedel járdem kóligi shaqyryldy. Jezqazǵan áýejaıyna qonǵannan keıin ushaqqa jetken dárigerler ólim faktisin tirkedi. Qazaq Air jolaýshynyń otbasy men jaqyndarynyń qaıǵylaryna ortaqtasyp, kóńil aıtady», delingen Qazaq Air baspasóz qyzmetiniń habarlamasynda.
