Shtab otyrysynda stýdentterge jataqhanadan oryn berý, halyqtyń áljýaz toptaryna áleýmettik kómek kórsetý, múmkindigi shekteýli jandarǵa arnalǵan ınfraqurylymdy jaqsartý máseleleri qaraldy.
Talqylaýǵa túsken máselelerdiń biri 2025 jylǵa qaraı kolledjder men ýnıversıtetter jataqhanalarynan keminde 50 myń jańa oryndy paıdalanýǵa berý boldy. Bıylǵy 1 qyrkúıektegi jaǵdaı boıynsha 1924 orynǵa arnalǵan 10 jataqhana paıdalanýǵa berildi. Osy jyldyń aıaǵyna deıin 12 185 oryndyq qosymsha 37 jataqhanany paıdalanýǵa berý josparlanyp otyr.
Kezdesý qorytyndysy boıynsha qysqa merzimde múddeli memlekettik organdarǵa memlekettik tapsyrysty ornalastyrý mehanızmin jetildirýge baılanysty usynystardy qaraý týraly buıryq berildi. Sondaı-aq jalǵyz basty qart azamattarǵa qosymsha áleýmettik qoldaý túrleri jóninde aıtyldy. Atap aıtsaq, qıyn jaǵdaıǵa tap bolǵan jalǵyzilikti jandarǵa birjolǵy materıaldyq kómek kórsetý, dári-dármekpen qamtamasyz etý, sanatorıı-kýrorttyq emdelý, turǵyn úıin jóndeýge qol ushyn berý syndy máseleler kóterildi. Erekshe qajettilikteri bar adamdar úshin pandýstar ornatý, arnaıy lıftter, dárethanalar salý jáne zaǵıp jandarǵa arnalǵan baǵyttaýysh belgiler ornatý jaıy da qozǵaldy.
Búginde qoǵamdyq baqylaýdyń aımaqtyq toptarynyń monıtorıng obektileri boıynsha jumysy jandandyrylyp jatyr. Jıynda múgedekterdi jumysqa ornalastyrý boıynsha júrgizilip jatqan jumystar legi de talqylandy. Birinshi jartyjyldyqtyń qorytyndysy boıynsha jumyspen qamtylǵan múgedekter úlesi jumyspen qamtý ortalyqtaryna júgingen eńbekke jaramdy múgedekterdiń 29,7%-yn quraıdy.
Premer-Mınıstrdiń birinshi orynbasary múgedekterdi jumyspen qamtý máseleleri boıynsha qoldaý sharalary keshenin qarastyrýdy (oqytý, jumys oryndaryn qaıta jabdyqtaý, jalaqynyń bir bóligin sýbsıdııalaý, jumyspen qamtý kvotasynyń saqtalýyn baqylaý) qamtamasyz etýdi jáne jumyspen qamtý máselesine erekshe nazar aýdarýdy tapsyrdy. Bul sharalar 2025 jylǵa deıin ázirlengen Ulttyq jumyspen qamtý jobasynda kórinis tabýy tıis.
