Bıyl túbektegi óńirde qýańshylyqtan zardap shekken sharýalarǵa qarjylaı qoldaý kórsetý úshin Úkimet rezervinen 1,9 mlrd teńge bólindi. Qaıtarymsyz qarajat tórt túliktiń analyq basy úshin mal azyǵyna jumsalǵan shyǵyndardy ishinara óteýge berilýde.
Basqarma basshysynyń aıtýynsha, qazirgi tańda bólingen qarajattyń 57%-y ıgerildi, ıaǵnı 5 900 jeke qosalqy úı sharýa qojalyǵyna 745 mln teńge jáne 575 sharýa qojalyǵyna 395 mln teńge qarjylaı memlekettik qoldaý kórsetilgen.
Jergilikti bıýdjetten 150 mln teńge bólinip, «Kaspıı» ÁKK AQ-y arqyly atalǵan qaıtarymdy qarjyǵa 15 shildeden beri ár qala, aýdandardan taǵaıyndalǵan operatorlar qajettilikke qaraı shóp tasymaldaýda. Búginge deıin 1 350 tonna shóp satyp alyndy jáne bul jumys jyl aıaǵyna deıin jalǵasady. Jergilikti bıýdjetten 54 mln teńge bólinip, qaıtarymdy qarajatqa aýdandardan taǵaıyndalǵan operatorlar Qostanaı oblysynan 950 tonna arpa jetkizdi. Qazirgi tańda arpa túgel satylyp, aınalymdaǵy qarjyǵa qosymsha 1 myń tonna mal azyǵyn satyp alý jumystary júrýde. Sonymen qatar 107 mln teńgege 15 vagon 3-4 surypty bıdaı (bıdaı qaldyǵy) satyp alyndy, jaqyn kúnderi óńirge jetkiziledi.
Jalpy, jyl basynan beri oblysqa 41 500 tonna shóp tasymaldandy. Sonyń 3500 tonnasy ózge óńirlerden kómek retinde jetkizilip, qýańshylyqtan zardap shekken mal ıelerine tegin úlestirildi. Al óńirge tasymaldanǵan jem kólemi 24 myń tonnany qurady.
Basqarma basshysy aýyl sharýashylyǵy janýarlaryn birdeılendirý bazasyna tirkelmegen malǵa memleket tarapynan sýbsıdııa nemese qoldaý kórsetilmeıtinin aıtty.
Qazir óńirde 636 824 bas mal tirkelgen. Onyń ishinde shyǵynǵa ushyraǵany – 1 163 (jalpy sanynyń 0,18%-y). О́lgen maldyń 194-i ǵana aýyl sharýashylyǵy janýarlaryn birdeılendirý derekqoryna tirkelgen.
– Tótenshe jaǵdaılar departamenti aýa ylǵaldylyǵyna tekserý júrgizdi. Nátıjesi tótenshe jaǵdaı jarııalaý sharttaryna sáıkes kelgen joq. Sondaı-aq janýarlar arasynda ýlaný men juqpaly aýrýǵa shaldyǵý deregi tirkelmedi jáne ósimdikter zııankesterden zaqymdanbaǵan, ıaǵnı tótenshe jaǵdaı jarııalaýǵa zańdy negiz joq, – dedi basqarma basshysy.
Kún tártibindegi máseleniń biri – maldyń qystyq azyq qoryn daıyndaý. 2021-2022 jyldarǵa óńirdegi tórt túlikti qystyq mal azyǵymen qamtamasyz etý maqsatynda, Premer-Mınıstr A.Mamınniń tapsyrmasyna sáıkes, bıýdjetten qaıtarymdy qarajat retinde mal azyǵyna 5,3 mlrd teńge qarjy bólindi. Onyń 1,9 mlrd teńgesi shópke, 3,4 mlrd teńgesi jemge qarastyrylǵan. Bul qarjyǵa jyl sońyna deıin 26 myń tonna shóp pen 34 myń tonna jem satyp alynady dep josparlanýda.
– Qazir atalǵan qarjynyń 600 mln teńgesine mal azyǵyn tasymaldaıtyn operatorlar taǵaıyndalyp, ózge óńirlerden shóp tasymaldaý jumystary bastalyp ketti. Budan bólek Atyraý men Aqtóbe oblystarynyń shabyndyq jerlerinen shóp shabýǵa 5 sharýa qojalyǵy barady. Olar ózderine qor jınap, artyǵyn ózge mal ıelerine satady. Sonymen qatar búginde jergilikti shabyndyqta 14 brıgada shóp shaýyp jatyr. Olar jyl sońyna deıin 15 myń tonna shóp daıyndamaq, – deıdi S.Qaldyǵul.
Mańǵystaý oblysy
