Eki mıllıonynshy almatylyq Aıala Jambyl polısııa qyzmetkeri Beıbit Ábildaev pen balabaqsha tárbıeshisi Álııa Janybekovanyń otbasynda ómir esigin ashqan. Ol otbasyndaǵy altynshy qyz. Buǵan deıin kópbalaly otbasy týystarynyń úıin panalap kelgen. Baspana jyryna núkte qoıyp, shahar basshysynyń qolynan páter kiltin alǵan jandardyń qýanyshynda shek joq.
«Ana retinde balalarymnyń týǵan kúnderi eń baqytty sát bolsa, al búgin páter kiltin alý eshqashan umytylmaıtyn eń baqytty kún. Biz mundaı syılyq alamyz dep oılaǵan joq edik», deıdi Aıalanyń anasy.
Qala kúni baspanadan taryqqan talaıdyń alystaǵy armanyn jaqyndatty. Atap aıtqanda, 227 kópbalaly otbasy «Nurly jer» baǵdarlamasy boıynsha megapolıstiń Naýryzbaı aýdanynda salynǵan jańa páterge kirdi.
Qonystanýshylardy quttyqtaǵan B.Saǵyntaev turǵyndarǵa áleýmettik qamqorlyq tanytý memlekettik saıasattyń basty baǵyty ekenin aıtyp, Almatyda jyl basynan beri 2 340 muqtaj otbasyǵa jeńildetilgen nesıemen turǵyn úı berilgenin málimdedi. Ákimniń sózinshe, kommýnaldyq turǵyn úı qorynan – 41;
«Baqytty otbasy» respýblıkalyq baǵdarlamasy aıasynda kópbalaly, tolyq emes otbasylar men múgedek balalardy tárbıelep otyrǵan jandarǵa 181 nesıelik zaem rásimdelgen.
Ásirese, kópbalaly otbasylarǵa beriletin nesıe sanyn ulǵaıtý maqsatynda jergilikti bıýdjetten nesıelerdi qosymsha qarjylandyrýǵa 3,3 mlrd teńge bólinipti. Bul shara taǵy 223 janǵa nesıe berýge múmkindik týdyrmaq. «Baqytty otbasy» baǵdarlamasy aıasynda 1 013 otbasyn baspanamen qamtamasyz etý josparlanǵan.
Qala bıligi tarapynan turǵyn úı baǵdarlamalaryna qajetti alǵashqy tólemniń bir bóligin qamtamasyz etýge járdemdesý úshin 1 mln teńge somasyndaǵy turǵyn úı sertıfıkattary áleýmettik kómek túrinde óteýsiz jáne qaıtarymsyz negizde berilip keledi. Bul úshin jergilikti bıýdjetten 2 mlrd teńge qarastyrylǵan. Qalanyń kezekte turǵan turǵyn úı sertıfıkatyn alýshylar – I jáne II toptaǵy múgedekter, múgedek balalary bar nemese olardy tárbıelep otyrǵandar, jetim balalar men ata-ana qamqorlyǵynan aıyrylǵandar, sondaı-aq kópbalaly otbasylar.
ALMATY
