Kezdesý barysynda agenttik tóraǵasy Dúnıejúzilik bankke memlekettik qyzmetti jetildirý salasyndaǵy agenttikpen uzaq merzimdi yntymaqtastyǵy jáne tájirıbesin bólisýge daıyndyǵy úshin alǵys bildirdi.
A.Jaıylǵanova Dúnıejúzilik bank ókilderine agenttikke qashyqtan jumys isteý boıynsha halyqaralyq tájirıbesimen bóliskeni úshin rızashylyǵyn bildirip, atalǵan tájirıbe Qazaqstannyń memlekettik qyzmetshileri úshin qashyqtan jumys isteýdi engizý kezinde negiz bolǵanyn atap ótti.
«Byltyr Dúnıejúzilik banktiń qoldaýymen agenttik Qazaqstannyń memlekettik qyzmetine Covid-19 áseri týraly saýaldama júrgizdi, oǵan Qazaqstannyń memlekettik qyzmetshileriniń 55%-y qatysty. Saýaldama nátıjeleri memlekettik qyzmetshilerdiń ıkemdi keste jáne qashyqtan jumys isteý, sondaı-aq jumys prosesterin sıfrlandyrý sııaqty balama jumys jaǵdaılaryn engizýge oń kózqaraspen qaraıtyndyǵyn kórsetti», dedi agenttik tóraǵasy.
Sondaı-aq agenttik basshysy bıyl shilde aıynda Dúnıejúzilik bank uıymdastyrǵan onlaın semınarǵa toqtalyp ótti. Semınar barysynda adamı resýrstardy basqarýdyń sıfrlandyrý men aqparattyq júıelerine basa nazar aýdara otyryp, memlekettik qyzmetti jańǵyrtýdyń halyqaralyq tájirıbesimen tanysýǵa, sondaı-aq memlekettik basqarýdy reformalaýdyń basqa da máselelerin talqylaýǵa múmkindik boldy.
Agenttik tóraǵasy memlekettik qyzmetkerler úshin sıfrlyq jumys ornyn qurýǵa, onyń ishinde iQyzmet platformasynyń kómegimen strategııalyq kadrlyq josparlaýdy engizýge jáne ishki bıznes-prosesterdi barynsha tıimdilik pen ıkemdilik jaǵyna qaıta qaraýǵa baǵyttalǵan agenttiktiń aldaǵy josparlary týraly aıtty.
Kezdesý barysynda Dúnıejúzilik bank qoldaý kórsete alatyn agenttiktiń memlekettik qyzmetti damytý jónindegi perspektıvalyq josparlary talqylandy. О́z kezeginde, Dúnıejúzilik banktiń Turaqty ókili Qazaqstannyń Dúnıejúzilik bankpen yntymaqtastyǵy aıasynda Memlekettik qyzmet isteri agenttigimen jeke kelisim jasasý máselesin qaraýǵa daıyn ekenin bildirdi.
«Egemen-aqparat»
