Nur-Sultan qalasy ákimdiginiń qoldaýymen ótken senbilikte 620 kılogramm qoqys jınaldy. Atalǵan ekologııalyq bastamaǵa 70-ke jýyq adam qatysty. Olardyń arasynda Nur-Cultan qalasynyń ákimdigi, EO elshilikteriniń, halyqaralyq uıymdardyń ókilderi, eko-eriktiler, jýrnalıster men Qazaqstan astanasynyń janashyr turǵyndary boldy. Shyny jáne plastıkalyq qaldyqtar Clean City NC kompanııasynyń kómegimen ári qaraı óńdeýge jóneltildi.
Eýropalyq odaqtyń Qazaqstandaǵy elshisi Kestýtıs Iаnkaýskas uıymnyń qorshaǵan ortany qorǵaýǵa qatysty ustanymyn baıandap berdi.
«EO sý aıdyndaryndaǵy lastanýdy, sonyń ishinde plastıkti azaıtý jáne aldyn alý jónindegi jahandyq qozǵalystyń bastamashysy boldy. Búgin #EUBeachCleanup naýqany aıasynda biz Nur-Sultandaǵy Esil ózenin tazalaýǵa az da bolsa mańyzdy úles qostyq. Naýqannyń maqsaty – qoǵamnyń nazaryn osy máselege aýdaryp, adamdardy qorshaǵan ortaǵa qamqor bolýǵa shaqyrý. EO kóptegen óńirlik jobalar men baǵdarlamalar sheńberinde óz kómegi men tájirıbesin usyna otyryp, Qazaqstannyń «jasyl ekonomıka» modeline kóshýin qoldaýdy jalǵastyra bermek», dedi Kestýtıs Iаnkaýskas.
EO jyl saıyn qyrkúıek aıynda búkil álem boıynsha muhıttardyń lastanýy máselesin kóterip, belsendilik tanytyp, osy máselege halyqtyń nazaryn basa aýdarý maqsatynda arnaıy naýqan uıymdastyrady. Bul qadam arqyly tabıǵatty jáne bıoalýantúrlilikti qorǵaýǵa baǵyttalǵan turaqty damýdyń birneshe maqsatyna qol jetkizýge bolady. Qazan aıynda ótetin BUU konferensııasyna daıyndyq aıasynda bıylǵy naýqan bıologııalyq áralýandyqqa arnalǵan.
Qazir taza aýyz sý máselesi planetanyń halqy kóp shoǵyrlanǵan qalalarynda óte mańyzdy bolyp otyr. Nıderland Koroldigi NL Waterway Cleanup naýqany aıasynda osy máselege nazar aýdarýǵa shaqyrady. Nur-Sultandaǵy Nıderland Koroldiginiń ýaqytsha senimdi ókili Naýt van Vaýdenberg iri qalalardaǵy aýyz sý máselesi kúnnen-kúnge ózekti bola beretinin málimdedi.
«Boljamǵa sáıkes, 2050 jyly álem halqynyń 68%-y qalalarda turatyn bolady. Bul sý men qaldyqtar máselesin tez arada sheshýdi odan ári ózekti etedi, óıtkeni qalalar taza sýsyz tirshilik ete almaıdy. Bul Nıderland eli úshin de óte mańyzdy másele. Bizdiń el aýmaǵynyń úshten biri teńiz deńgeıinen tómen bolǵandyqtan, sý – Gollandııa tarıhy men mádenıetiniń mańyzdy bóligi. Klımattyń ózgerýi men jyldam ýrbandalý bizge sheshimi kúttirmeıtin jańa qıyndyqtar men júgi aýyr mindetterdi júkteıdi. Sondyqtan Nıderland Dúnıejúzilik tazalyq kúninde birqatar sharany usynady. Sol sebepti búkil álemde NL Waterway Cleanups naýqandaryn uıymdastyrady. Búgin Nur-Sultanda áriptesterimizben birge Esil ózenin tazartýǵa kóńil bóldik. Osylaısha, biz turaqty qalalar úshin taza sýdy barlyq jerde qol jetimdi etýge shaqyrǵymyz keledi», dedi Nıderland eliniń Qazaqstandaǵy ókiletti ókili.
Bul senbilik Estonııa bastamashy bolǵan halyqaralyq ekologııalyq qozǵalys – Dúnıejúzilik tazalyq kúni qarsańynda ótti.
«Dúnıejúzilik tazalyq kúni – bizdiń zamanymyzdyń eń iri azamattyq qozǵalystarynyń biri, ol búkil álem boıynsha 180 eldiń azamattaryn jer sharyn tazalaý maqsatynda biriktiredi. Bul kúni búkil álemdegi belsendiler qorshaǵan ortany lastanýdan tazartý úshin jınalyp, jaǵajaılardy, ózenderdi, ormandardy jáne kóshelerdi qoqystan tazartady. Bul álemdi ózgertýge baǵyttalǵan shaǵyn ǵana joba Estonııada 2008 jyly paıda boldy, bes saǵat ishinde búkil eldi tazartý úshin 50 000 adam jınalǵan. 2019 jyly 21,2 mıllıon ekobelsendi búkil álemde 36 saǵattyq tazartý tolqynyna qosylǵan edi. Ol Jańa Zelandııada bastalyp, Gavaıda aıaqtalyp, búkil álemdi sharlady deýge bolady», dedi Estonııanyń Qazaqstandaǵy elshisi Toomas Tırs.
