Arqa tósinde tuńǵysh uıymdastyrylǵan is-sharanyń maqsaty da aıqyn. Ol ultymyzdyń baı mádenıetin shyǵarmashylyq, mýzyka, qolóner, oıyn-saýyq jáne sport arqyly kórsetý edi.
Festıval aıasynda «Sheberler qalasy» degen taqyrypta halyq qolónershileriniń ekspozısııasy kelýshiler nazaryna usynyldy. Balqashtaǵy M.Hamzın atyndaǵy mádenıet saraıynyń ishi kıiz kilemderge, tekemetterge, zergerlik buıymdarǵa, ulttyq naqyshtaǵy kıim-keshekterge tolyp ketti. Budan bólek, ulttyq taǵamdar kórmesi de kelýshilerdiń nazaryn ózine aýdardy. Al jergilikti sportshylar bolsa, qazaq kúresi, asyq atý jáne toǵyzqumalaq syndy ulttyq sport túrlerinen óz sheberlikterin kórsetti.
Arnaıy qurylǵan qazylar alqasy ónerpazdardyń shyǵarmashylyq darynyna baǵa bergennen keıin, jeńimpazdar men júldegerlerge syı-syıapattar jasaldy. Sondaı-aq «Saıyn dalam – Saryarqa» atty teatrlandyrylǵan qoıylymda ánshiler men aıtyskerler jurt aldynda óner kórsetip, qazylar men kópshiliktiń yqylasyna bólendi.
Oblystyq mádenıet, muraǵattar jáne qujattama basqarmasynyń basshysy Erkebulan Jumakenov Balqashtan bastaý alǵan «Saryarqanyń kóshpeli mádenıeti» festıvali aldaǵy ýaqytta Osakarov, Buqar jyraý, Nura jáne Abaı aýdandarynda, sonymen birge Qaraǵandy men Temirtaý qalalarynda jalǵasatynyn aıtady.
Al baıqaý márege jetkennen keıin, úzdik shyqqan ónerpazdar men sheberler jeltoqsan aıynda kenshiler astanasynda ótetin gala-konsertte óner kórsetetin bolady.
Qaraǵandy oblysy,
Balqash qalasy
