Uıymnyń Nıý-Iorktegi shtab páterinde álemniń 100-den astam memleket basshylary men delegasııa músheleri bas qosty. Jıynǵa bizdiń elimizdiń atynan Qazaqstannyń Syrtqy Ister Mınıstri ári Premer-mınıstirdiń orynbasary Muhtar Tileýberdi bastaǵan delegasııa ókilderi qatysýda.
76-shy sessııanyń taqyryby klımattyń ózgerýi, kovıd pandemııasymen kúres jáne jahandyq qaýipsizdik pen turaqtylyq máselelerin sheshýge arnalyp otyr. Sonymen qatar, bıylǵy jıynda Aýǵanstandaǵy jaǵdaıǵa, erekshe nazar aýdarylady dep kútilýde.
Uıymnyń bas hatshysy Antonıý Gýtterısh óziniń kirispe sózinde «adamzat balasy tarıhtaǵy eń úlken daǵdarysty bastan keship jatqanyn» aıtyp, kómekke muqtaj elderge qol ushyn sozýǵa shaqyrdy.
«Joǵary mártebeli qatysýshylar! Dabyl qaǵatyn ýaqyt keldi. Adamzat burys baǵytta ketip bara jatyr. Jáne bizdiń oıanatyn ýaqytymyz jetti. Qazirgi pandemııa ýaqytynda damyǵan memleketterdiń basym bóligi vaksınalanyp úlgergenimen, afrıkalyqtardyń 90 prosenti ekpeniń birinshi dozasyn da ala almaı otyr. Kovıdten bólek, túrli elderdegi tóńkerister, saıası tartystar men klımattyń ózgerýi, adam quqyqtarynyń taptalýy syndy kóptegen problemalar bar. Jáne olar adamnyń qolymen jasaldy. Demek ony sheshý de qolymyzdan keledi degen sóz. Qymbatty qatysýshylar, atalǵan máselelrdi sheshý úshin áreketke kóshetin ýaqyt keldi», dedi BUU bas hatshysy Antonıý Gýterrısh.
Aıta keteıik, birinshi kúniniń aıasynda Muhtar Tileýberdi Lıtva, Sıngapýr, Aýstrııa, Sırııa jáne Chernogorııa elderiniń syrtqy ister mınıstrlerimen kezdesip, birqatar ekijaqty kelissóz ótkizdi. Sonymen qatar, qyrkúeıktiń 27-ne deıin jalǵasatyn jıynda elimizdiń atynan beıne úndeý formatynda Memleket Basshysy Qasym-Jomart Toqaev sóıleıdi dep kútilýde.
