Alqa otyrysynda anyqtalǵan oń qadamdar

Keshe Astanada Premer-Mınıstrdiń birinshi orynbasary Baqytjan Saǵyntaevtyń qatysýymen Kólik jáne kommýnıkasııalar mınıstrliginiń alqa otyrysy boldy. Oǵan atalǵan salanyń mınıstri Asqar Jumaǵalıev tóraǵalyq etti. Májiliste ótken jylǵy jumystar qorytyndylanyp, alda atqarylatyn mindetter naqtylandy. Alqa májilisine sala mamandarymen qatar, Parlament depýtattary men Prezıdent Ákim­shiligi qyzmetkerleri keldi. Jı­nalǵan qaýymdy kún tártibimen tanystyrǵan A.Jumaǵalıev, ótken jyldyń qorytyndysy týraly baıandaı kelip, dál búgingi kúnde mınıstrliktiń aldynda turǵan mindetter jóninde áńgimeledi. Memleket basshysy men Úkimet júktegen tapsyrmalar múltiksiz iske asyrylyp jatqany jaıly aıtty. «О́tken jyly 2200 shaqyrym respýblıkalyq mańyzy bar avto­jol jóndeldi. Zaman talabyna saı 13 birdeı elektrondy tarazy ornatyldy. Sondaı-aq, kóliktik baqylaýdyń 11 turaqty beketi jaby­lyp, teńiz porttarynyń júk­terdi ótkizý qabileti 16,8 mln. tonnaǵa deıin ulǵaıtyldy. Al, áýede 15 halyqaralyq avıamar­shrýt, temirjolda 6 birdeı jolaýshy baǵyty ashyldy. Oǵan qosa, 241 qyzmet kórsetý men ruqsat berý júıesi avtomattandy­ryldy. Taǵy bir jetistigimiz, uıaly baılanys operatorlary arasyndaǵy ınterkonnekt mól­sheri 15 paıyzǵa tómendetilip, oblys ortalyqtarynda 4G qyz­metin qosý isi bastaldy. Son­daı-aq, el turǵyndarynyń teń­ jartysy efırlik sandyq telera­dıo­taralymǵa qol jetkizdi», dedi mınıstr. Eldegi avtojoldar da A.Juma­ǵa­lıevtyń nazarynan tys qal­mady. «Buıyrtsa, aǵymdaǵy jyly Astana-Býrabaı aqyly tas jolynan 1 mıllıard teńgeden astam qarjy túsedi dep otyrmyz. Osylaısha, bul ýchaskeni kútýdiń barlyq shyǵynyn tolyq jabamyz», dep qaıyrdy ol. Negizi avtojol aqyly bolǵannan beri shamamen jarty mıllıardtaı teńge jınalypty.  Mınıstr ótken jyly jemisti atqarylǵan jumystardy tizbeleı kelip, joldardy jóndeý isine kóptep jańa tehnıka-tehnologııalar tartylyp jatqanyna toqtaldy. Byltyr avtopark­ter men temirjol parkteriniń aıtarlyqtaı jańaryp, jańǵyrǵanyn tilge tıek etti. Máselen, avtoparkter 1700 jańa avtobýs pen 840 jańa júk mashınasymen tolyǵypty. Temirjolda 97 lokomotıv, 1704 júk jáne 237 jolaýshy vagondary jańalanypty. Kommýnıkasııa salasyna da keńinen toqtalǵan mınıstr ústimizdegi jyly oryndalatyn mindetter jóninde aıtty. 2014 jyly elimizde res­pýb­lı­ka­lyq mańyzy bar 2,3 myń sha­qyrym avtojol jóndelip, 18 qosymsha elektrondy tarazy ornatylady. Jańadan 5 jo­ǵa­ry jyldamdyqty temirjol ba­ǵyttary iske qosylady. Budan bólek, 13 áýe baǵdary ashylyp, 160 elektrondy qyzmet pen ruqsat berý qujattary avtomattandyrylatyn bolady. Dese de, bıylǵy negizgi jumys Memleket basshysynyń tapsyrmasy boıynsha ázirlengen kólik ınfraqurylymyn damytý jónindegi 2010-2014 jyldarǵa arnalǵan jáne «Aqparattyq Qazaqstan-2020» memlekettik baǵ­darlamasynda qarastyrylǵan sharalar aıasynda atqarylady, dedi A.Jumaǵalıev. Bıyl «Elektrondy úkimet» damýynyń jańa kezeńi bastalady eken. Atap aıtqanda, smart government damytý jónindegi jumys jalǵasady. Ol boıynsha azamattyń jeke kabıneti jasalady. Ol e-gov portalynyń paıdalanýshysyna óziniń jeke derekterin baqylaýǵa múmkindik beredi. Sonymen qatar, 160 elektrondy qyzmetti avtomattandyrý jos­parlanyp otyrylǵan kórinedi. Utqyr elektrondy qyzmetter men servıster tizimi 50-ge deıin keńeıtilmek. Mınıstrlik uıaly baılanys sapasyn arttyrý maqsatynda aı­maqtarda tekserý jumysyn ári qaraı jalǵastyra bermek. Odan tys 2014 jylǵy MNP-abo­nentke óz nómirin saqtaı otyryp, operatordy aýystyrýyna múmkindik beretin tehnologııany testileý uıǵarylypty. Osynaý jaǵymdy aqparattarmen baıandamasyn aıaqtaǵan mınıstr Memleket basshysy men Úkimettiń bıylǵy jylǵa júktegen mindetterin tolyq oryndaıtyndaryn aıtty. Alqa májilisin Premer-Mınıstrdiń birinshi orynbasary B.Saǵyntaev qorytyn­dy­lady. «Memleket basshysy «Qazaqstan joly – 2050: bir maqsat, bir múdde, bir bo­la­shaq» atty Joldaýynda Kó­lik jáne kommýnıkasııalar sa­lasynda at­qarylýǵa tıis jumystardy naqtylap berdi. Ol mindetterdi júzege asyrýǵa memleketimizdiń shamasy jetedi. Sondyqtan aldyn ala jasalǵan baǵdarlamalar men olardaǵy joba-josparlardy durys júıelep, júzege asyrý joldaryn aıqyndap alý kerek», dedi Úkimet basshysynyń birinshi orynbasary. «Búginde jemisti júrgizilip jatqan jumystarǵa qaramastan, joldyń sapasyna qatysty máseleler áli de ózek­ti. Qazirgi ýaqytta jergilikti mańyzdaǵy joldardyń – 40, res­pýblıkalyq tasjoldardyń 20 paıyzynyń jaǵdaıy qanaǵat­tanarlyqsyz. Sondyqtan osy baǵyttaǵy jumysqa úlken kóńil bólý kerek», dep jalǵady sózin B.Saǵyntaev. Onyń aıtýyna qaraǵanda, kólik jaǵdaıy da kóńil qýant­paıdy. Áli kúnge deıin kóp­te­gen eldi mekender avtobýs­pen tolyq qamtylmaǵan eken. Qamtylǵandarynyń tozýy joǵary deńgeıde. О́kinishke qa­raı, bul kórsetkish 80 paıyzǵa jýyq kórinedi. Keden odaǵynyń tehnıkalyq reglamentine sáıkes, 2015 jyl­dyń 1 qańtarynan bastap odaq aý­maǵynda Eýro-5 standarty en­giziledi. Reseı men Belorýssııa osy standartqa ótken. Bul biz­diń elge de qatysty. Kólik jáne kommýnıkasııa mınıstrligi men jergilikti atqarýshy organdar­ elimiz Eýro-5 standartyna kósh­ken­ge deıin avtobýs parkterin meı­linshe jańartýlary qajet, dedi B.Saǵyntaev. Sebebi, keler jyldyń basynan bastap avtobýstardyń baǵasy 18 paıyzǵa deıin qymbattaıdy eken. Sondyqtan, Premer-Mınıstrdiń birinshi orynbasary bul sharýaǵa úlken mán berip, oń qadam jasaý kerektigin eskertti. Nurbaı ELMURATOV, «Egemen Qazaqstan».