Qytaı Indonezııa men Bangladesh sekildi damýshy elderde kómir qoldaný arqyly júzege asatyn jobalardy qoldap kelgen. Soǵan baılanysty aýaǵa parnıktik gazdar shyǵarylymyn azaıtý boıynsha Parıj klımattyq kelisiminde kórsetilgen mindetti oryndaý máselesinde jıi synǵa ushyraǵan.
Sı Szınpın mundaı málimdeme jasaǵan alǵashqy basshy emes. Bıyl jyl basynda Ońtústik Koreıa men Japonııa osyǵan uqsas qadamǵa barǵan edi.
«Qytaı basqa damýshy elderge jasyl jáne kómirtegi az energııany damytýǵa qoldaýdy kúsheıtedi. Sondaı-aq shetelde kómir arqyly jumys isteıtin jańa jobalar salmaıdy», dedi Sı BUU-nyń jyl saıynǵy jınalysynda.
Buǵan deıin jıyn barysynda Amerıka Qurama Shtattarynyń prezıdenti Djo Baıden 2024 jylǵa qaraı kedeı elderge qarjylyq kómekti eki ese ulǵaıtý týraly josparyn jarııalaǵan.
AQSh-tyń klımat jónindegi ókili Djon Kerrı Qytaı basshysynyń málimdemesin jyly qabyldap, ony «úlken úles» dep baǵalady.
«Biz bul týraly Qytaımen biraz ýaqyt sóılestik. Men Sı Szınpınniń osyndaı mańyzdy sheshim qabyldaǵanyn estigenime óte qýanyshtymyn», dedi Kerrı.
COP 26-ny basqaratyn brıtandyq mınıstr Alok Sharma da Qytaı basshysynyń málimdemesin joǵary baǵalady.
«Men Sı Szınpınniń shetelde jańa kómir jobalaryn qurýdy toqtatý týraly mindettemesin quptaımyn. Qytaıǵa sapar barysynda osy máselege basa nazar aýdardyq», dedi A.Sharma.
