Ekshn janryndaǵy ǵylymı-fantastıkalyq kartınanyń tusaýy kesildi
Sońǵy kezderi aıaq alysyn nyqtap, kórermen qaýymdy kádimgideı eleńdetip otyrǵan «Qazaqfılm» kınostýdııasynyń jańashyl jumystaryna tileýles kóńilmen ondaǵy qolǵa alynǵan árbir jobaǵa, árbir jańa týyndyǵa sáttilik tilep, shyqqan fılmderdiń birin de qalt jibermeýge tyrysyp júrgenimiz ras. Mine, jaqyn kúnderi «Qazaqfılm» kınostýdııasy kezekti, túsirilýi bólek týyndysyn – «Eles qýǵan saıypqyran» atty ǵylymı-fantastıkalyq elementteri bar kórkem fılmdi birden eki tilde tartý etkeli otyr. Shyndap kelgende, jańa fılm ekshn janryn jaqsy kóretin kórermenderdiń kóńilinen shyǵýy tıis. Birden aıta ketý kerek, blokbaster aýqymdy speseffektilerimen, sapaly grafıkasymen erekshelenedi. Kartınany áý basta álemdik prokatqa shyǵarý kózdelgendikten, Krıstanna Loken («Termınator-3: Kólikter kóterilisi») jáne Armand Assante («Odısseıa», «Gangster») sııaqty gollıvýdtyq juldyzdardyń bul fılmge túsýge kelisim berýi kezdeısoqtyq emes. Sol sııaqty, qazaqstandyq ekshn Alla Pýgachevanyń jıen nemeresi Nıkıta Presnıakov syndy tanymal adamdar men óz akterlerimiz – Sanjar Mádıev, Ásel Saǵatova, Kamıla Ermekovalardy úlken ekranǵa shyǵaryp otyr.
Fılmniń prokatqa shyǵýyna oraı ótkizilgen baspasóz máslıhatynda túsirý toby jan-jaqty suhbat berip, basty rólderdegi Sanjar Mádıev pen Nıkıta Presnıakovtar qyzyqty da qıyn sátter týraly áńgimeledi.
Al túsirý alańynda «Tıgr» degen laqap atqa ıe bolǵan kartına rejısseri Marına Kýnarova fılmdi álemdik kıno aıdynyna shyǵarý úshin Ýma Týrman, Monıka Belýchchı sııaqty mega-juldyzdardyń da shaqyrylǵanyn aıtady.
Eń qyzyǵy, olar qazaqstandyq kartınaǵa túsýge kelisim de bergen. Tipti, ár kartınasy úshin 3 mıllıon AQSh dollarynan kem suramaıtyn Ýma Týrman keńdik tanytyp, 1 mıllıonǵa da Qazaqstanda jumys isteýge kelisken.
– Alaıda, qazirge biz úshin bul da qymbattaý. Qarjymyz esepteýli bolǵandyqtan, álemdik deńgeıdegi qalaǵan juldyzdarymyzdy shaqyra almadyq. Menińshe, aldaǵy ýaqytta bizdiń akterler de gollıvýdtyq kartınalarǵa túse bastaıdy. Al Loken men Assanteniń keıipkerleri – amerıkalyqtar, sondyqtan da biz úshin de bul rólderdi oryndaıtyn akterlerdiń amerıkalyqtar bolǵany mańyzdy edi, – deıdi rejısser.
Sonymen, «Qazaqfılmniń» kartınasyna túsken amerıkalyq akterlerdi Nastıa Temkına men Vladımır Eremınder dýblıajdaǵan. Osy arada, kóptegen Gollıvýd juldyzdaryn, onyń ishinde Al Pachınony oryssha «sóıletken» ózi rejısser ózi ataqty akter Vladımır Eremın ekenin eske sala ketýge bolady.
Qysqasy, otandyq prokatqa joldama alǵan «Eles qýǵan saıypqyran» fılmi mamyr-maýsym aılaryna qaraı kóptegen elderde kórsetile bastaıdy. Fılm prodıýseri Ernar Málikov Santa Monıkadaǵy iri kınobazarda kartınany prokatqa alýǵa qyzyǵýshylyq tanytqan kompanııalar mundaı ekshndy áıel adam túsirgenin bilgende úlken tańdanys bildirgenderin aıtady.
Fantastıkalyq elementteri bar, shytyrman oqıǵalyq údedegi janrlyq fılmde qazirgi kompıýterlengen zamananyń bolashaqta adam ómirine tıgizer yqpaly basty taqyrypqa shyqqan. Fılm jelisi boıynsha ǵylymı tehnologııalarmen aınalysatyn «Global Securiti» atty korporasııa álemdegi qylmyspen kúresý maqsatynda GS-kod oılap tabady. Biraq, bul – oılap tabylǵan tehnologııanyń qoǵamǵa qajetti bir qyry ǵana. Ony oılap tabýshylardyń túpki maqsaty – «Eles» júıesin engizý arqyly adam sanasyn basqarý jáne osy jolmen túrli qıturqy áreketterin oryndatý edi. О́zderiniń túpki maqsatyn júzege asyrmaq bolǵan top ókilderi Tımýr atty polıseı jigittiń súıgen qyzyn qylmysqa ıtermeleıdi. Al Tımýr súıiktisin jalǵan jaladan arashalap qalý úshin ólimge bas tigedi. Keıin ańǵal jigit ańdamaı júrip, qylmys áleminiń «qýyrshaǵy» bolǵanyn túsinedi. Biraq óte kesh. Sebebi, «eles qýamyn» dep júrip, jumysynan, dostarynan birjolata aıyrylyp tynǵan jigittiń endigi maqsaty – kek alý. Ashynǵan jan degenine jete me, teris pıǵyldy adamdardyń áreketin áshkerelep, kúlli adamzatty tónip kele jatqan qaterden qutqara ma?
«Eles qýǵan saıypqyran» fılmi búgingi qazaq kınosynyń jańasha izdenis órisin taǵy bir márte dáleldeı túskendeı. Operatorlyq sheberlik, dınamıkaǵa qurylǵan sıýjet, qazirgi kompıýterlik grafıkanyń jetistikteri meılinshe paıdalanylǵan. Ekshn janry bolǵandyqtan munda ur da jyq kórinister jeterlik. Biraq, barlyq qoıylymdar, kaskaderlik trıýkter, kásibı deńgeıde oryndalǵan. Tutastaı alyp qaraǵanda, zamanaýı kıno talaptaryna saı, kórermenderdiń búgingi tańdaǵy suranysyn esepke ala otyryp, gollıvýdtyq formatta túsirilgen zamanaýı fılm dep paıymdaýymyzǵa bolady.
Fılmniń prokat jelisi halyqaralyq deńgeıde qamtylýy úshin Gollıvýd jáne Reseı juldyzdary shaqyrylypty. Basty rólderdiń biri – erjúrek polıseıdi somdaǵan Sanjar Mádıev. Hakerdiń rólindegi reseılik ánshi Alla Pýgachevanyń jıen nemeresi Nıkıta Presnıakov ekenin joǵaryda aıttyq.
Basty keıipkerlerge bóget jasap, olardyń jolyn kesken Rásh esimdi arýdyń rólin aktrısa Krıstanna Loken somdaǵan.
Kıno áleminde talantty ssenarııshi retinde tanylǵan Marına Kýnarovanyń alǵashqy rejısserlik jumysy «999» atty drama janrynda túsirilgen tolyqmetrajdy kórkem fılm. Jas ta bolsa bul rejısserdiń qıyn da kúrdeli ekshn janryna batyl qadam jasaýy jáne de ony óz deńgeıinde atqara bilýi qýanarlyq jaı.
Aınash ESALI,
«Egemen Qazaqstan».
ALMATY.
