Osydan on jyl buryn Taraz qalasynda qarýly lańkesti ustaý kezinde erlikpen qaza tapqan polısııa qyzmetkeri Ǵazız Baıtasovtyń esimin el esinde máńgilikke saqtaý maqsatynda elimizde kóptegen sharalar atqaryldy. Batyr ulǵa «Halyq qaharmany» ataǵy berilip, jer-jerlerde Ǵ.Baıtasovqa arnalǵan eskertkish taqtalar ashyldy.
Búgin atalǵan oqıǵanyń 10 jyldyǵyna oraı Maqan Esbolatov atyndaǵy Almaty akademııasynda «Halyq qaharmany» Ǵazız Baıtasovqa arnalǵan buryshtama taqta (stend) ashylyp, oǵan batyrdyń jubaıy arnaıy shaqyryldy.
Almaty akademııasynyń basshysy Aıdar Saıtbekov pen marqumnyń jubaıy Gúljamal Mahambetqyzy buryshtama taqtany saltanatty túrde ashty.
Jańa ashylǵan buryshtamaǵa orkestr áýenimen gúl qoıý rásimin ótkizgen soń, akademııa ǵımaratynda ekskýrsııa uıymdastyrylyp, klýbta oqytýshy-professorlyq qurammen, kýrsanttarmen kezdesý ótkizildi. Ǵazız Baıtasovtyń erligi jaıly derekti fılm kórsetildi.
