Respýblıka aýmaǵynda aıaz aqpannyń ortasyna deıin bolady

Qańtardyń sońyn ala kúshine mingen aıazdyń saldarynan 1-11synyp oqýshylary men kolledjdiń 1-2 kýrs stýdentterine sabaq toqtatyldy. Bul týraly «Qazaqstan» telearnasy habarlady . Qarly burqasyn men qatty aıazdan respýblıka tóńiregindegi birneshe  joldar jabyldy. Máselen, Aqtóbe oblysynda «Aqtóbe-Astrahan», «Aqtóbe-Orsk», «Qandyaǵash-Embi-Shalqar-Yrǵyz» baǵyttary boıynsha kólik qozǵalysy toqtatyldy. Sondaı-aq «Almaty-Ekaterınbýrg», «Qyzylorda-Pavlodar», «Jezqazǵan-Petropavl» baǵyttary boıynsha da joldardyń jabylǵany habarlandy. Al Qostanaı oblysynda kólikterdiń barlyq túrleriniń «Qarabutaq-Denısovka-Rýdnyı-Qostanaı», «Jezqazǵan-Petropavl», «Jetiqara-Qamysty-Lermontovka», «Denısovka-Jetiqara-RF shekarasy» baǵyttary boıynsha kólik qozǵalysy shekteldi. «Arktıkalyq aýa massalary yqpalynyń Qazaqstanǵa enýine baılanysty qańtar aıynyń sońǵy kúnderi batys aımaqtarda túnde temperatýra -28, -36 gradýs, soltústik jáne ortalyqta -35, -40 gradýs, Qyzylordada jáne Ońtústik Qazaqstan oblystarynda -23, -28, shyǵysta -25 -36 gradýsqa deıin tómendedi. Jambyl jáne Almaty oblystary ońtústik sıklonnyń áserinde bolǵandyqtan, bul aımaqtarda qar jaýyp, burqasyn soǵyp, jel kúsheıdi, túngi temperatýra -10 -15 gradýsqa deıin jetti», - dedi «Qazgıdromet» RMK jetekshi ınjener-sınoptıgi Nursáýle Qýandyqova. «Qazgıdromet» mamandarynyń boljaýynsha, qatty aıaz aqpannyń ortasyna deıin saqtalady. Sondyqtan tótenshe jaǵdaılar qyzmetkerleri jeke bastyń qaýipsizdigi úshin borandy úskirik aıazdy kúni alys jolǵa shyqpaý kerektigin aıtady. О́ıtkeni, Qostanaı, Qaraǵandy, Shyǵys Qazaqstan men Aqmola oblystarynyń keı jerlerinde burqasyn bolyp, jel turýy yqtımal.Sonymen birge, Almaty, Jambyl, Ońtústik Qazaqstan, Qyzylorda jáne Mańǵystaý oblystarynda kún kúrt sýytady. Aqtóbe, Soltústik Qazaqstan, Atyraý men Mańǵystaý oblystarynyń keı jerlerinde de aıaz kúsheıedi. Ámirhan Almaǵanbetov. Derekkóz: «Qazaqstan» telearnasy. Foto: Trend.az.