Erteń HHII Qysqy Olımpıadanyń alaýy tutanady

Dúnıe dodasynyń dúbiri

Aq Olımpıadany aqparattyq qoldaý

Prezıdent janyndaǵy Ortalyq kommýnıkasııalar qyzmetinde Sochıde jalaýyn kóteretin qysqy Olımpıadany otandastarymyzdyń tamashalaýy jaıynda brıfıng ótti. Basqosýdyń bul jolǵy qonaqtary Ádilet mınıstrligi Zııatkerlik menshik quqyǵy komıtetiniń tóraǵasy Abzal Estaev pen Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Qalııanbekov boldy. «Bıyl Sochı qalasynda baı­raǵy kóteriletin HHII Qysqy Olım­pııa oıyndaryn kórsetý quqy­na «Habar» jáne «Qazsport» tele­arnalary ıe bolyp otyr. Dú­birli dodanyń ashylý saltanaty 7 aqpan kúni Astana ýaqyty boıynsha 22:00-de atalǵan telearnalarda tikeleı efırde kórsetiletin bolady. Ashylý saltanatynyń hronometrajy shamamen 3,5 saǵatqa sozylady. Al saıystyń jabylý saltanaty 23 aqpanda jergilikti ýaqytpen 22:00-de ótedi. Alǵashqy translıasııa «Qazsport» telearnasynan 6 aqpan, beısenbi kúni saǵat 11:55-ten bastap kórsetile bastaıdy. Onda snoýbord jarysynan kórsetilimder usynylady. Jalpy, kórermenderge yńǵaıly bolý úshin respýblıkalyq «Egemen Qazaqstan» men «Kazahstanskaıa pravda» gazetteriniń 5 aqpan kúngi sanynyń sońǵy betterinde jarys kestesi berilgen. On­da qazaqstandyq sportshylar qa­ty­satyn barlyq jarystar belgi­lengen», dedi Mádenıet jáne aqparat mınıstrligi Aqparat jáne muraǵat komıtetiniń tóraǵasy B.Qalııanbekov. Sonymen qatar, ol dúıim jurt kóz tikken dúbirli jarysqa elimizden 47 jýrnalıst attanǵanyn jáne onyń 15-i sol jerden saıys bitkenshe habarlar taratatynyn da nazardan tys qaldyrmady. Efırge shyǵatyn tikeleı kór­setilim men jazylym arqyly kór­setiletin efırlerdi qosqanda barlyǵynyń jalpy ýaqyty 350 vıdeokontentti quramaq. «Habar» telearnasy 51 translıasııa kór­set­se, onyń 34-i tikeleı bolmaq. Al «Qazsport» telearnasy 140 kór­setilimniń 78-in tikeleı efır ar­qyly usynbaq. Aq Olımpıada ke­zinde «Qazsport» telearnasy ózi­niń efırin tolyqtaı derlik atal­mysh sharaǵa arnamaqshy. Qazaqstandyq telekórermender Olımpııa oıyndaryn der kezinde tamashalaýǵa múmkindik alyp otyr. Barlyq kórsetilimderdi kom­mentatorlar qazaq jáne orys til­derinde júrgizedi. Sondaı-aq, kór­setilimge kommentatorlardan bólek belgili sport sańlaqtary men ardager sportshylardy tarta otyryp, kórermender úshin saıys­ty tartymdy berýge barynsha nazar aýdarylǵan. Ábdirahman QYDYRBEK, «Egemen Qazaqstan».

«Synǵa daıynmyn!»

Sochıdegi aq Olımpıadada baq synaıtyn Qazaqstan ulttyq quramasynyń sapynda Qaraǵandy óńirinen jalǵyz-aq sportshy bar. Ol –muzdyń ústinde jelmen jarysqan júırik jerlesimiz Ekaterına Aıdova. Bul kúnde álemdik deńgeıdegi tisqaqqan konkıshilerdiń qatarynan sanalatyn Ekaterına – el úmit artyp otyrǵan sanaýly sańlaqtardyń biri. Ekaterına 2010 jyly Ulttyq qurama sapynda Vankýver Olımpıadasyna qatysty. Sol Olımpıadadan keıin ol Berlın qalasynda ótken jasóspirimder arasyndaǵy Álem kýbogy synynyń absolıýtti jeńimpazy atanǵan bolatyn. Sondaı-aq, 500 jáne 1500 metrlik qashyqtyqtarda eresekter arasyndaǵy Qazaqstan rekordyn jańartqan talantty sprınter. Týǵan qalasy Qaraǵandyǵa anda-sanda bir keletin, onyń ózinde bir-eki kún ǵana aıaldaıtyn Aıdovamen týra aq Olımpıadanyń qarsańynda áńgimelesip qalýdyń sáti túsken edi. – Ekaterına, Sochı Olım­pıa­dasyna daıyndyq qalaı ótti? – Oqý-jattyǵý jıyndary ne­gi­zinen Germanııa, Kanada jáne AQSh-tyń bıik taýly aımaqtaryndaǵy muz aıdyndarynda ótti. Qysqy maý­sym Álem kýbogy synynyń tórt kezeńimen bastaldy. Bul jarys­tarda biz Olımpıadaǵa joldama beretin upaılardy sarapqa saldyq. Men úshin maýsym sátti bas­taldy. Aldyma qoıǵan maqsatyma jetip, úsh qashyqtyq boıynsha lısenzııa jeńip aldym. – Saǵan Sochı qalasyndaǵy muz aıdyny tanys pa? – Iá. Aldyńǵy jyly álem chem­pıo­naty Sochıde ótkende boldym. Men sol dodada óner kórsettim. Shy­­nyn aıtqanda, Sochıdiń muz aıdyny Astanadaǵy bizdiń keshenge qat­ty uqsaıdy. – Ekaterına, Sochı Olım­pıa­­da­­syndaǵy óz múmkindigińe qan­daı baǵa beresiń? Bapkeriń aldyńa qandaı mindet qoıyp otyr? – Olımpıadaǵa qatysatyn sportshylardyń qaısysy bolsyn úmitsiz bolmaıdy ǵoı. Tórt jylda bir ótetin mundaı dodaǵa álsiz sportshynyń kelmeıtini belgili. Álbette, sáttilik degendi joqqa shyǵarýǵa taǵy bolmaıdy. О́zime keletin bolsam, daıyndyǵym jaman emes. Dodaǵa túserde ózimniń naǵyz sporttyq babymda bolam degen senimdemin. Bapkerim jarys jolynda qatelikke boı aldyrmaı, bárin de aspaı-saspaı durys isteýdi qulaǵyma quıyp jatyr. – Olımpıada synynda basty qarsylasym bolady degen sportshylardy ataı alasyń ba? – Negizi, men úshin bári de bas­­ty qarsylas. Biraq, azııalyq kon­­kı­shilerdi – Japonııa, Koreıa jáne Qytaı sportshylaryn bóle-jara aıtar edim. Nege deseńiz, bir qur­lyqtan bolǵan soń bizdiń aramyz­daǵy ishteı básekelestik qashanda burq-sarq qaınap jatady. – Ekaterına, konkı sporty­men jalpy qaı kezden bastap aı­na­­lystyń? – Qaraǵandydaǵy №83 orta mek­­­tep­tiń 4-synybynda oqyp júr­ge­nimde konkımen júgirý spor­ty­na balalardy iriktep aldy. So­lardyń qatarynda men de boldym. Alǵashqy jattyqtyrýshym Vene­ra Talǵatqyzy Grıneveskaıa bol­dy. Sodan keıin 11 jasymda qazir­gi bapkerim Sergeı Stepanovıch Los­kýtnıkovtiń qaramaǵyna aýystym. – Sportshylar otbasynan shyq­qan bolarsyń? – (Kúldi) Joq. Ákem Qara­ǵan­dy­daǵy Kúzembaev atyndaǵy shahtada jumys istegen, qazir basqa kásippen aınalysady. Anam – mýzyka mamany. Maksım esimdi aǵam Qaraǵandydaǵy Qazaqstan-Reseı ýnıversıtetiniń ekonomıka fakýltetin támam­daǵan, qazir jumys isteıdi. Jal­py, ózimniń kenshiniń qyzy eke­nimdi maqtan etemin. Serik Sá­pıev­tiń, Gennadıı Go­lov­kınniń de ákeleri kenshi emes pe?! Al ózim Qaraǵandydaǵy Álııa Mol­daǵulova atyndaǵy sportqa beıim­di, daryndy balalarǵa ar­nal­ǵan ob­lystyq sport-ınternatty bitir­dim. Bul jerde meni ekinshi bapkerim Vladımır Vladımırovıch Levchenko jattyqtyrdy. – Alǵashqy iri tabysyń týraly aıtsań... – 2006 jyly Almatydaǵy Me­deý muz aıdynynda Qazaqstan chempıonaty ótti. Sol jarysta men chempıon atanyp, Qytaıdyń Chan-Chýn qalasynda ótken jasóspirimder ara­syndaǵy álem chempıonatyna jol­dama aldym. Bul jeńis men úshin óte mańyzdy boldy. Ult­tyq qurama komanda sapyna qabyl­danyp, Sergeı Valerevıch Sýrgý­tı­nov syndy bilikti bapkerdiń qara­ma­ǵynda jattyǵa bastadym. Bir sóz­ben aıtqanda, Medeýdegi jeńis sport­taǵy karerama jol ashyp berdi. – Sochı-2014 qysqy Olım­pıa­dasyna arnalǵan sporttyq kıim úlgisi unady ma? – Shynymdy aıtsam, bizdiń sport­tyq forma úlgilerin kórip, onyń ádemi dızaınyna tań-tamasha qal­­dym. Jańa zamanǵa saı, ózindik sán máneri bar eken. Menińshe, bizdiń for­­ma úzdikterdiń qatarynan oryn alýy tıis. – Dastarqan mázirinen ne unaı­dy? – Meniń súıikti asym – qazaqtyń et ta­ǵamy. Meıramhanalarǵa bara qal­ǵanda, kóbine osy asqa tapsyrys beremin. Jalpy, biz, konkıshiler sonshalyqty dıeta saqtap jatpaımyz, kóńilimiz qalaǵan asty jeı beremiz. – Saǵan basqa memlekettiń aty­­nan óner kórsetýge shaqyrǵan usy­­nystar túsip jatsa qaıter ediń? – Bilesiz be, maǵan osyndaı su­raq­tar jıi qoıylady. Mundaı suraqqa beretin jaýabym da daıyn: men tek Qazaqstannyń týy astynda ǵana óner kórsetemin. Qazaqstan sııaqty jan-jaqty damyp kele jatqan el­de ómir súre­tinime shúkirshilik ete­min, salı­qaly saıasat ustanatyn Pre­zıdentimizdiń barlyǵyn maqtan etemin. Men – elimiz Táýelsizdiginiń tól qurdasymyn. Sondyqtan, Táýelsizdik degen uǵymnyń men úshin mańyzy zor. Bir sózben aıtqanda, men – óz Otanymnyń patrıotymyn! – Ekaterına, óziń kóptegen elderde bolyp júrsiń. Salys­tyrmaly túrde, bizdiń eldegi sport­tyń damý barysy týraly ne aı­tar ediń? – Bizdiń sport ilgeri damyp keledi. Qazirgi tańda bizdi halyq­ara­lyq arenada jurttyń kóbi tanı­dy, bizben sanasatyn boldy. Rasyn aıtqanda, bizdiń osy dárejege jetýi­mizge sportshylarymyzdyń Lon­don Olımpıadasyndaǵy tamasha je­tistikteriniń sep bolǵany sózsiz.

Áńgimelesken

Aıqyn NESIPBAI,

«Egemen Qazaqstan».

 QARAǴANDY.