Bul týraly «Astana» telearnasy málimdedi.
Telearna málimetinshe, jalaqy az, qaýip-qater kóp bolǵandyqtan elimizdiń óńirlerinde órt sóndirýshiler jetispeıdi. Bıyl Qazaqstanda 7,5 myń órt bolyp, saldarynan 250 adam qaza taýyp, sonsha adam zardap shekken.
Nur-Sultan qalalyq №4 MО́B bóliminiń komandıri Azamat Rahymjanovtyń aıtýynsha, bul qyzmette ýaqytynda jınalyp, emosııaǵa erik bermeý.
«Men órtke ketkende, kezekshilikke shyqqanda jaqyndarym ýaıymdaıdy. О́te aýyr sátter bolyp, jumystan shyǵyp ketkim keledi. Jalaqy adam ómiri men ólimine tatymaıdy. Biz adamdardy qutqaryp, kún saıyn basymyzdy qaterge tigemiz», deıdi Rahymjanov.
Telearna málimetine súıensek, jalaqy az, oǵan eshkim kelgisi kelmegendikten, Rahymjanov jumys isteıtin bólimshege áli 10 qutqarýshy kerek. Eldiń basqa óńirlerinde de jaǵdaı osyndaı.
Qazaqstanda ár 36-shy órt adam ólimimen aıaqtalady. Mysaly, AQSh-ta ár 360 órttiń bireýinde ǵana adam ólimi bolady eken. Ulybrıtanııada bul kórsetkish 14, Fransııada 27 ese az.
Qazaqstanda kóp jaǵdaıda jekemenshik sektorda órt bolady. Soltústik Qazaqstan, Aqmola, Shyǵys Qazaqstan jáne Qostanaı oblystarynda bul turǵyda jaǵdaı nashar. Bul óńirlerde órtten qaza tapqandar sany eldegi ortasha kórsetkishten úsh ese kóp.
