Bul týraly Boxingscene.com aqparattyq portaly jazdy.
Buǵan deıin Reseıdegi dopıng rejımin áshkerelegen kanadalyq professor óziniń 149 betten turatyn baıandamasynda 2016 jylǵy jazǵy olımpıada oıyndarynyń 11 jekpe-jegin tergegen.
Tergelgen jekpe-jekter arasynda aýyr salmaqtaǵy reseılik Evgenıı Tıshenko men qazaqstandyq Vasılıı Levıttiń fınaldyq kezdesýi de bar. Onda Tıshenko sharshy alańda Levıttiń soqqylary basym bolǵanyna qaramastan, tóreshilerdiń biraýyzdan sheshimimen jeńiske jetti. Osylaısha jemqor sheneýnikter men tóreshiler altynnyń kimge buıyratynyn aldyn-ala oılastyrǵan.
Sondaı-aq, ırlandııalyq Maıkl Konlan men Reseıdiń taǵy bir boksshysy Vladımır Nıkıtın arasyndaǵy jeńil salmaqtaǵy shırek fınaldyq jekpe-jek jáne 91 keli salmaqta brıtandyq Djo Djoısty jeńgen fransýzdyq Tonı Ioka da tergeýden ótken.
Baıandamada AIBA halyqaralyq boks assosıasııasynda sybaılas jemqorlyq faktileriniń kóp jyldar boıyna qaıtalanyp jatqandyǵy jazylǵan. Sonymen qatar Rıchard Maklarenniń jazbalarynda «2012 jyly Londonda ótken boks oıyndarynyń týrnırinde de sybaılas jemqorlyq bar» degen derekter keltirilgen.
«Bul AIBA-nyń paıdasy úshin nemese ulttyq federasııalar men olardyń olımpıadalyq komıtetterine, keıde jarys uıymdastyrýshylaryna qarjylyq jáne saıası qoldaý kórsetý úshin, alǵys aıtý úshin jasaldy. Búgingi tańda júrgizilgen tergeý mundaı manıpýlıasııalarda keıde alty tańbaly somalar qoldanylǵan degen qorytyndyǵa keldi», delingen baıandamada.
Evgenıı Tıshenkonyń ıtalııalyq Klement Rýssony jeńýi de sybaılas jemqorlyqpen baılanysty bolýy múmkin degen kúdik bar.
