Keshe Qazaqstan Respýblıkasy Premer-Mınıstriniń orynbasary Gúlshara Ábdiqalyqovanyń, Parlament depýtattarynyń, Prezıdent Ákimshiligi, Úkimet ókilderiniń, ortalyq jáne jergilikti memlekettik organdardyń, Mádenıet jáne aqparat mınıstrligine vedomstvolyq baǵynysty uıymdardyń, qoǵamdyq uıymdardyń, BAQ basshylarynyń qatysýymen Mádenıet jáne aqparat mınıstrliginiń keńeıtilgen alqa otyrysy ótti.
Mádenıet jáne aqparat mınıstri Muhtar Qul-Muhammed óz sózinde mınıstrliktiń 2013 jylǵy jumysyn qorytyndylap, Memleket basshysynyń «Qazaqstan joly – 2050: bir maqsat, bir múdde, bir bolashaq» atty Joldaýyn júzege asyrýda sala aldynda turǵan mindetterge toqtaldy. Baıandamashy qazaqstandyqtardyń básekege qabiletti mádenı dilin qalyptastyrýǵa, zamanaýı mádenıet klasterlerin damytýǵa baǵyttalǵan Qazaqstan Respýblıkasynyń mádenı saıasatynyń uzaqmerzimdi tujyrymdamasyn ázirleýdiń mańyzdylyǵyn mádenıettiń barlyq salasy, shyǵarmashylyq qaýymdastyq bul qadamdy Elbasy usynǵan otandyq mádenıet pen ónerdiń jańa belesterge jetýiniń, qazaqstandyq qoǵamnyń biregeı shyǵarmashylyq áleýetin júzege asyrýdyń erekshe múmkindigi dep qabyldap otyrǵanyn atap kórsetti. Tujyrymdamanyń basty ıdeıalyq irgetasy Memleket basshysy óziniń Joldaýynda aıtqan Máńgilik El ıdeıasy bolýy tıis ekendigi basa aıtyldy.
Salanyń jaı-kúıi týraly áńgimelegen mınıstr 20 jyl ishinde elde 2 myńnan astam mádenıet nysandary ashylǵanyn tilge tıek etti. Sońǵy on jyl ishinde teatr, kıno kórermenderiniń, murajaılarǵa kelýshilerdiń, kitaphana oqyrmandarynyń, konserttik baǵdarlamalardy tamashalaýshylardyń sany aıtarlyqtaı artqan.
Mádenıet salasynyń problemalaryn sheshýdiń basty joldary 2030 jylǵa deıingi áleýmettik jańǵyrtýdyń tujyrymdamasy men josparynyń jobasyna bólek taraý bolyp endi. Mádenıet uıymdarynyń tıptik shtattary, mádenıet uıymdaryn dıfferensııalyq sýbsıdııalaýdyń jańa erejeleri bekitildi, 300 orynǵa arnalǵan Mádenıet úıiniń tıptik jobasy ázirlendi, mádenıet jáne muraǵattyq is qyzmetkerleriniń azamattyq qyzmetkerler retindegi eńbekaqysyn tóleýdiń jańa modeli ádisnamalyq turǵyda ázirlendi.
Mınıstr Memleket basshysynyń 2015 jylǵy 1 shildeden bastap azamattyq qyzmetkerlerdiń jalaqysyn arttyrý týraly tapsyrmasynyń mádenıet jáne muraǵat isi salasyna tolyqtaı qatysy bar ekenin erekshe atap ótti.
Jańa «Astana Opera» memlekettik opera jáne balet teatry, Qazaq ulttyq murajaıy quryldy, tuńǵysh Ulttyq kórkemóner galereıasy qurylýda, «Kazsport», «Bilim jáne mádenıet» jańa telearnalary ashyldy.
Alqa otyrysynda M.Áýezov atyndaǵy Qazaq memlekettik akademııalyq drama teatrynyń dırektory Erkin Jýasbek, «Bilim jáne mádenıet» telearnasynyń dırektory Baqyt Qaıyrbekov, L.N.Gýmılev atyndaǵy EUÝ-diń azamattyq-quqyqtyq pánder kafedrasynyń professory, «Eýrazııalyq quqyq qorǵaý ortalyǵy» QQ sarapshysy zań ǵylymdarynyń doktory Eńlik Nurǵalıeva, Almaty oblysynyń Mádenıet, muraǵattar jáne qujattama basqarmasynyń basshysy Rahmet Esdáýletov sóz sóıledi.
Alqa otyrysyn Qazaqstan Respýblıkasy Premer-Mınıstriniń orynbasary Gúlshara Ábdiqalyqova qorytyndylap, mınıstrlikke birqatar naqty tapsyrmalar men usynymdar berdi.
«Egemen-aqparat».
