Memlekettik kirister komıteti tóraǵasynyń orynbasary Jaıdar Ińkárbaevtyń aıtýynsha, Elbasy Nursultan Nazarbaevtyń bes ınstıtýsıonaldyq reformany iske asyrý jónindegi 100 naqty qadam – Ult josparynyń 42-qadamyn jáne Qazaqstan Respýblıkasynyń Sybaılas jemqorlyqqa qarsy strategııasyn oryndaý úshin 2021 jyldyń 1 qańtarynan bastap, jalpyǵa birdeı deklarasııalaý kezeń-kezeńimen engizilip jatyr. «Jeke tulǵalar birinshi jyly aktıvter men mindettemeler týraly kiris deklarasııasyn tapsyrady, keıin negizdeme bolsa, jyl saıyn kiristeri men múlki týraly deklarasııany usynady. Aldymen memlekettik qyzmetshiler men olarǵa teńestirilgen adamdar men jubaılary deklarasııa tapsyrdy, sebebi bul qyzmetkerler oǵan daıyn boldy» deıdi ol.
Memlekettik qyzmetkerlerden keıin 2023 jyldyń 1 qańtarynan bastap memlekettik mekemeler men kvazımemlekettik sektor qyzmetkerleri men olardyń jubaılary aktıvteri men mindettemeleri týraly kiris deklarasııasyn usynady. Odan keıin 2024 jyldyń 1 qańtarynan bıznes ókilderi, ıaǵnı zańdy tulǵalar men jeke kásipkerlerdiń basshylary, quryltaıshylary jubaılarymen tapsyrady. Sońǵysy – 2025 jyldyń 1 qańtarynda ótedi. Onda basynda baspanasy, múlki bar barlyq azamat deklarasııalaýdan ótedi. Sóıtip, bas-aıaǵy 13 mıllıon adam deklarasııalaý júıesine qatysady.
Deklarasııada azamattar mynadaı málimetterdi kórsetýi tıis: shet memlekette tirkelgen ne tirkeýge jatatyn jyljymaıtyn múlik, kólik quraldary; sheteldik bank shottaryndaǵy aılyq eseptik kórsetkishten 1000 ese asatyn qarajat; turǵyn úı qurylysyna úlestik qatysý týraly shart boıynsha somalar; Qazaqstan Respýblıkasynan tys jerde qurylǵan zańdy tulǵanyń jarǵylyq kapıtalyna qatysý úlesi; baǵaly qaǵazdar, týyndy qarjy quraldary; ınvestısııalyq altyn; zııatkerlik menshik, avtorlyq quqyq obektileri; 10 000 aılyq eseptik kórsetkish shegindegi somada kórsetiletin qolma-qol aqsha;
Aktıvter men mindettemeler týraly deklarasııa turǵylyqty jeri boıynsha, ıaǵnı jeke tulǵa tirkelgen salyq organyna usynylady.
Deklarasııany elektrondy túrde salyq tóleýshiniń kabıneti Cabinet.salyk.kz, «Elektrondy úkimet» portaly egov.kz arqyly, sondaı-aq e-Salyq Azamat jáne eGov mobile mobıldi qosymshalary arqyly tapsyrýǵa bolady.
Tabys etý merziminiń aıaqtalýyna qaraı, ıaǵnı 2021 jylǵy 15 qyrkúıekke qosa alǵanda, deklarasııany 497 myń adam tapsyrǵan.
Qabyldanǵan 512 myń deklarasııanyń ishinde eń kóp taralǵan ótinim berý tásili bolyp e-Salyq Azamat mobıldik qosymshasy anyqtalǵan, onyń kómegimen deklarasııalardyń 54%-y usynylǵan. «Salyq tóleýshiniń kabıneti» jáne SONO arqyly – 40%, «Elektrondy úkimet» portaly arqyly – 5%.
Deklarasııany qaǵaz túrinde usynǵandar jalpy deklarasııa tapsyrýshylardyń 0,1%-yn quraǵan.
Jalpyǵa birdeı deklarasııalaý kezinde memlekettik qyzmetkerlerdiń shetelde qansha banktik shottary, jyljymaıtyn múlikteri men kólikteri bary eseptelgen. J.Ińkárbaevtyń málimdeýinshe, deklarasııany usynǵan 497 myń jeke tulǵanyń 440-ynda sheteldik bankterde jeke shoty bar. Sıfrlarǵa sensek, qazaqstandyq sheneýnikter aqshasyn Reseı Federasııasynda, Amerıka Qurama Shtattarynda, Shveısarııa bankterinde saqtaǵandy táýir kóredi.
Sondaı-aq 494 jeke tulǵa 26 eldegi 666 jyljymaıtyn múlik obektisin deklarasııalaǵan, onyń ishinde 436 obekti – Reseıde, 44-i – Birikken Arab Ámirlikterinde, 38-i Túrkııada jáne t.b
1 030 jeke tulǵa 49 shet memlekette tirkelgen 1 198 kólik quralyn qujatta kórsetken. Ol kólikterdiń 292-si – Reseıde, 235-i – Armenııada, 221-i – Japonııada, 162-si – Germanııada bolyp shyqty. Basqa da elderde tirkelgen kólikter bar. Biraq eń kóp kólik tirkelgen elder osy atalǵandar.
Deklarasııa tapsyrǵan 47 azamattyń bizdiń elden tys 57 zańdy tulǵaǵa qatysý úlesi bar. Bul Reseı, Kıpr, Arab Ámirlikteri syndy elderdegi kásiporyndardyń, mekemelerdiń aksıoneri, quryltaıshylardyń biri degen sóz.
1585 jeke tulǵa 11 elde 1 603 jyljymaıtyn múlik obektisiniń qurylysyna qatysý úlesiniń bar ekenin kórsetti. Buǵan qosa, 116 adam ınvestısııalyq altyndy jarııalady; 25 elde 918 adam baǵaly qaǵazdary baryn usyndy; 635 ınvestısııalyq paı qorlarynda 608 adamnyń paıy bar; 212 adamnyń 218 zııatkerlik menshik, avtorlyq quqyq obektisi bar; 355 adamnyń debıtorlyq, 578 adamnyń kredıtorlyq bereshegi bar. 1 704 jeke tulǵa 2 327 nysandy senimdi basqarýǵa bergen.
Búginde jalpyǵa birdeı deklarasııalaý erejelerin túsindirý úshin biryńǵaı baılanys ortalyǵy iske qosylǵan. Jalpy jeke tulǵalardyń kiristeri men múlkin jalpyǵa birdeı deklarasııalaýǵa qatysty tolyq aqparatty Qazaqstan Respýblıkasy Qarjy mınıstrligi Memlekettik kirister komıtetiniń resmı saıtynyń Kgd.gov.kz «Jalpyǵa birdeı deklarasııalaý» bóliminen alýǵa bolady. Apta saıyn sársenbi kúnderi Memlekettik kirister departamentteri Zoom arqyly «suraq-jaýap» formatynda túsindirý júrgiziletinin de esterińizge salamyz.
