Aqtoty Raıymqulova quttyqtaý sózinde qazaq jáne ózbek halqynyń týystyq, dostyǵynyń tarıhy tereńde ekenin, eki eldiń tili men mádenıeti tamyrlas ekenin aıtty.
«Eki el arasynda yntymaqtastyqtyń berik quqyqtyq júıesi quryldy. Osy ýaqytqa deıin Máńgilik dostyq týraly kelisim-shart (1998 jyl) jáne strategııalyq áriptestik týraly kelisim-shart negizinde aǵaıyn memleketter arasyndaǵy jan-jaqty yntymaqtastyq pen ózara senim qaǵıdattary jazylǵan birqatar qujat kúshine engen. Memleketterimiz arasyndaǵy yntymaqtastyqtyń nyǵaıýy Qazaqstan men О́zbekstan basshylarynyń dostyq, kórshilik jáne strategııalyq áriptestikti nyǵaıtýǵa degen saıası erik-jigeri men ózara umtylysynyń arqasynda múmkin bolyp otyr. Osy oraıda Qazaqstan men О́zbekstan arasyndaǵy gýmanıtarlyq baılanystyń orny erekshe ekenin atap ótkim keledi. Mádenıet pen óner ortadaǵy kóptegen ıgi istiń irgetasyna aınaldy. Qazaqstannyń Tuńǵysh Prezıdenti Nursultan Nazarbaev aıtyp ótkendeı, «Bizdiń maqsatymyz – osy qarym-qatynasty, ózara senimdi nyǵaıtyp, ony keıingi urpaqqa jetkizý». Búginde eki memleket arasynda óner salasyndaǵy baılanys belsendi damyp keledi. Máselen, jyl saıyn ózbekstandyq sheberler Almatyda ótetin Ortalyq Azııa qolónershileriniń jármeńkesine qatysady. Nur-Sultan men elimizdiń basqa qalalaryndaǵy kórkem galereıalary men murajaılarynda tanymal ózbek sýretshileriniń kórmeleri ótedi. Mýzyka jáne teatr ujymdary elimizde turaqty túrde óner kórsetýde. О́z kezeginde, bizdiń ártisterimiz Samarqanda ótetin mýzyka festıvaline belsendi qatysyp jatyr», dedi Aqtoty Raıymqulova.
Vedomstvonyń baspasóz qyzmetiniń jazýynsha, osydan keıin mınıstr eki el arasyndaǵy kıno salasyndaǵy áriptestiktiń tarıhy tereńde ekenin, Qazaqstan men О́zbekstan birlesip birqatar tamasha fılm túsirgenin aıtqan.
«Biz Melıs Abzalov, Damır Salımov, Shýhrat Abbasov, Alı Hamraev syndy basqa da kóptegen kórnekti, óner sheberiniń esimin máńgi este saqtaımyz. Qazirgi óskeleń urpaqtyń osy ıgi dástúrdi jalǵastyrýǵa kúsh salyp kele jatqany qýantady. О́zbek kınematografısteri óz fılmderin qazaqstandyq kınofestıvalderde turaqty kórsetýde. Mysaly, О́zbekstannyń halyq aqyny Erkın Vahıdovtyń «Altyn qabyrǵa» shyǵarmasy negizinde túsirilgen «Kórshiler» atty fılm osynyń dáleli», dedi mınıstr.
