Aqqaınar qoınaýy – asyl qazyna

Berel qoryq-mýzeıi «Qazaq Altaıynyń b.d. I myńjyldyq basynyń (II-V ǵǵ.) eskert­kishteri: halyqtardyń Uly qonys aýda­rýynyń jáne Eýra­zııanyń etnomádenı qury­lymynyń qalyptasýynyń bastaýlary» atty granttyq joba aıasynda Aqqaınar qorymynda qazba jumystaryn júrgizýdi qolǵa alǵan. Erte kóktemde belgili arheolog Zeınolla Sama­shevtiń jetekshiligimen Aqqaınar aýylynyń soltústik-shyǵysynan Aqqaınar-1, Shý jáne Qańsar atty úsh nysanda qazba jumystary bastalǵan. Nátı­jesinde, arheologter úsh qo­rymda da tarıhı qundy jádigerlerge kenelgen.

Aıta ketsek, Qańsar qorymynan Qaraqa­badaǵydaı jerleý ǵuryptary baıqalǵan. Sol dáýirdiń nanym-senimderi bolsa kerek; adam, onyń janyna jylqy jerlengen. Adam belinen qoramsaq tabylǵan. Qaıyńnyń qa­by­ǵynan jasalǵan qoramsaqtyń beldikke bekitiletin qola ilgegi bar. Al Aqqaınardan sám­bı kezeńindegi b.z.d V-IV ǵasyrdaǵy jerleý dástúri anyqtaldy. Qazba jumystary kezinde dál sol jerden qysh ydystardyń qaldyqtary, aǵashtyń kúli shyqqan. Úshinshi qorym – Shý­dan shyqqan jádigerler qola pyshaq, eki qumyra, súıekten jasalǵan jebeniń ushtary. Arheologterdiń aıtýynsha, munda eki adam jerlenipti.

Jer astynan jádigerlerdiń shyǵyp jat­qanyn estigen Aqqaınar aýylynyń tur­ǵyn­dary qýanyp júrse kerek. Nege deseńiz, Buq­tyrmanyń oń jaǵalaýyndaǵy asfaltsyz, súreń tartqan aýyldardy tarıhqa qyzyqqan týrıster basyp ótip, ál-aýqattaryn jaqsartyp kete me degen úmit. Alaıda Berel-qoryq mýzeıi dırektory mindetin atqarýshy Almas Sar­ba­sovtyń sózine qarasaq, munda úlken ke­shen­niń boı kóterýi ýaqyt enshisindegi suraq. Biraq úsh-tórt jyldaı arheologııalyq jumys­tar júr­gizi­ledi. Qazirgi tańda aýdannyń ózge de qor­­ǵandaryna topografııalyq jospar jasal­dy.