Jumyr jerdegi birde-bir komanda óziniń ataq-dańqy jaǵynan Brazılııamen teńese almaıdy. Osyǵan deıin segiz ret uıymdastyrylǵan álem chempıonatynyń beseýinde olar bas júldeni oljalady. Tarqatyp aıtsaq, 1989-1996 jyldar aralyǵynda ótken alǵashqy úsh jarystyń sońǵy synynda Nıderland (2:1), AQSh (4:1) jáne Ispanııany (6:4) utty. 2008 jáne 2012 jyldarǵy birinshiliktiń sheshýshi básekesinde qatarynan eki ret ıspandyqtardan basym tústi. Brazılııada penaltıden (2:2, 4:3) jeńse, Taılandta qosymsha ýaqytta (3:2) tize búktirdi. 2000 jyly Gvatemalada kúmis medaldy moıyndaryna ildi. Ońtústik Amerıkanyń qurlyǵynyń fýtzalshylary fınalda ózderiniń syralǵy qarsylasy Ispanııaǵa 2:3 esebimen ese jibergen bolatyn. Dál sol jarystyń toptyq týrnırinde olar Qazaqstannyń fýtzalshylaryn tas-talqan etip jeńgeni de esimizde. Bul matchta qazaqstandyqtar 12:1 esebimen oısyraı jeńildi. 2004 jyly Taıpeıde brazılııalyqtar qola medaldy qanaǵat tutsa, 2016 jyly Kolýmbııadan qurqol oraldy. 1/8 fınaldyq mejede olar oıda joqta Iranǵa ese jiberdi.
Lıtvadaǵy álemdik dop dodasyn Brazılııa fýtzalshylary ádettegideı óte keremet bastady. Toptyq saıysta olar Vetnam (9:1), Chehııa (4:0) jáne Panamany (5:1) utty. Pleı-offtyń alǵashqy eki matchynda Japonııa (4:2) men Marokkony (1:0) jolynan yǵystyrdy. Alaıda jartylaı fınalda Argentınadan (1:2) aılasyn asyra almady.
Bul básekeni bizdiń jigitter óte keremet bastady. Damylsyz shabýyldardyń nátıjesinde 12-mınýtta esep ashyldy. Igıta qaqpadan shyqqan bette Albert Aqbalyqovqa keremet pas berdi. Onyń tizemen baǵyttaǵan doby qaqpashyǵa tıip, nysanaǵa dóp tústi. Bul gol bizdiń jigitterdi jigerlendirgeni sonshalyq, olar qarqynyn esh báseńdetken joq. Dáýren Nurǵojınniń esepti eseleýge eki tamasha múmkindigi boldy. Biraq oǵan sáttilik joldas bolmady.
Úzilisten keıin shıelenisti saıys jalǵasty. Qazaqstan quramasy jıi shabýyldaǵanymen, 25-mınýtta Taınan abaısyzda óz qaqpasyna gol soǵyp, brazılııalyqtardyń jolyn ashty. Arada bes-alty mınýt ótkende ol jerlesterimizdi alǵa shyǵaryp, óz qateligin jýyp-shaıǵandaı boldy. Biraq odan keıin dańqty Brazılııa fýtzalshylaryn tusaýlaýdyń esh múmkindigi bolmady. Olar qatarynan úsh gol soǵyp, álem chempıonatynyń qola júldegeri atandy. Otandastarymyz tórtinshi oryndy ıelendi. Biraq oıynshylarymyzǵa esh ókpe aıta almaımyz. Osy dop dodasynda olar keremet oıyn órnegin kórsetip, tórtinshi orynǵa turaqtady. Bul – ázirge Qazaqstan fýtzalshylary tarıhyndaǵy eń zor tabys.
Fınalda Argentına men Portýgalııa kúsh synasty. Bul kezdesýde 2:1 esebimen Pıreneı túbeginiń túlekteri jeńis toıyn toılady. Osylaısha, olar tuńǵysh ret álem chempıony atandy. Qarsylastar qaqpasyna 9 gol soqqan brazılııalyq Karlos Vagner Gýlarte Fılo (Ferran) jarys qorytyndysy boıynsha surmergender kóshin bastady. Eń úzdik oıynshy ataǵy taǵy da Portýgalııanyń juldyzy Rıkardınıýǵa buıyrdy.
