«Aqorda rezıdensııasynda 11 memlekettiń Tótenshe jáne О́kiletti elshileri Qazaqstan Prezıdentine senim gramotalaryn tapsyrdy», delingen habarlamada.
Senim gramotalaryn Birikken Arab Ámirlikteriniń elshisi Mýhammad Saıd Ál-Arıkı, Shveısarııanyń elshisi Devıd Grıhtıng, Irlandııa elshisi Braıan Makeldaff, Meksıka elshisi Hose Lýıs Martınes Ernandes, Jańa Zelandııa elshisi Sıaleı Allegra van Týr, Albanııa elshisi Kastrıot Robo, Grenada elshisi Oleg Fırer, Mavrıtanııa elshisi Sıd’Ahmed Ál Bekaıe Hamadı, Týnıs elshisi Tarak Ben Salem, Norvegııa elshisi Djon Mıkal Kvıstad jáne Nıkaragýa elshisi Alba Asýsena Torres Mehııa tapsyrdy.
Qasym-Jomart Toqaev dıplomattardy elimizdegi mıssııalarynyń resmı bastalýymen quttyqtady.
«Sizder Taıaý Shyǵys, Eýropa, Latyn Amerıkasy, Karıb basseıni, Afrıka jáne Okeanııa sııaqty álemniń ár bóliginiń ókilisizder. Qazaqstan halyqaralyq yntymaqtastyqty nyǵaıtýdy jaqtaıtyn el retinde sizderdiń memleketterińizben aradaǵy dostyq baılanystardy ekijaqty formatta da, kópjaqty formatta da odan ári nyǵaıtýǵa daıyn», dedi Memleket basshysy.
Prezıdent dıplomattardyń nazaryn elimizdiń táýelsizdiginiń tarıhı kezeńi - 30 jyldyǵyna aýdardy. Ol qazirgi Qazaqstan - ishki turaqtylyq, san alýandylyqta birliktiń tıimdi modeli, serpindi ekonomıkalyq ósý men teńdestirilgen syrtqy saıasat úshin qurmetke ıe jetilgen jáne qalyptasqan memleket ekenin atap ótti.
Qasym-Jomart Toqaev elimizdiń zamanaýı syn-qaterlerdi, sonyń ishinde klımattyń ózgerý saldaryn eńserýdegi tásilderine toqtaldy. Onyń pikirinshe, Glazgoda ótetin Jahandyq konferensııa aıasynda qabyldanatyn ýádelerdiń oryndalýy aıryqsha mańyzǵa ıe. Osyǵan baılanysty Memleket basshysy Qazaqstannyń kómirtekti beıtaraptyqqa qol jetkizý jónindegi josparlary týraly eske saldy.
«Osy aıda biz Kómirteginen beıtarap damýdyń 2060 jylǵa deıingi tujyrymdamasyn júzege asyrýǵa kirisemiz. Jasyl ekonomıkany qarjylandyrý jáne jasyl tehnologııaǵa qoljetimdilik atalǵan bastamany iske asyrýda mańyzdy ról atqarady. BAÁ, Shveısarııa, Irlandııa, Jańa Zelandııa jáne Norvegııa memleketterimen qatar sizderdiń de elderińizben yntymaqtastyqty nyǵaıtamyz degen úmittemiz», dedi Prezıdent.
Qasym-Jomart Toqaev azyq-túlik jáne sý qaýipsizdigin qamtamasyz etýdiń mańyzdylyǵyna da toqtaldy.
«Qazaqstan azyq-túlik tasymaldaýdyń jahandyq júıesine belsendi atsalysady. Biz aýyl sharýashylyǵy sektoryn ekologııalandyrýǵa jáne turaqty damytýǵa nıettimiz. Azyq-túlik qaýipsizdigi jónindegi Islam uıymyn qurýǵa bastamashy boldyq jáne qazirgi ýaqytta osy uıymǵa tóraǵalyq etip otyrmyz. Onyń quramyna 1,5 mıllıardqa jýyq halqy bar 36 el kiredi», dedi Memleket basshysy.
Is-shara barysynda Prezıdent 2010 jylǵy EQYU Sammıtiniń Astana deklarasııasynda jarııa etilgen jalpy jáne bólinbeıtin Eýroatlantıkalyq jáne eýrazııalyq qaýipsizdik qoǵamdastyǵyna beıildiligin rastap, Albanııanyń 2020 jyly EQYU tóraǵasy qyzmetindegi tıimdi kóshbasshylyǵyn quptady.
Prezıdent qaýipsizdikti qamtamasyz etý máselelerine qatysty janjaldardyń aldyn alý men Azııadaǵy beıbitshilikti qoldaý elimizdiń syrtqy saıası basymdyqtarynyń biri ekenin atap ótti. Osy turǵyda ol AО́SShK-tiń qaýipsizdik máselelerin sheshýge ujymdyq tásilderdi ázirleý úshin ómirsheń platforma retindegi rólin atap ótti.
Qasym-Jomart Toqaev Aýǵanstandaǵy jaǵdaı týraly da aıtyp, osy eldiń jańa bıligin zorlyq-zombylyqtyń, esirtki kontrabandasynyń jáne baqylaýsyz kóshi-qonnyń kez kelgen kórinisteriniń aldyn alý jónindegi mindettemelerdi oryndaýǵa shaqyrdy.
Memleket basshysy elshilerdi Qazaqstannyń Aýǵanstandaǵy turaqtandyrý jónindegi halyqaralyq kúsh-jigerge qosqan úlesi týraly habardar etti.
«Aýǵan halqyna gýmanıtarlyq kómek retinde quny 2,5 mıllıon dollar bolatyn 5 myń tonna bıdaı unyn jetkizý máselesin pysyqtap jatyrmyz. Mundaı kómek atalǵan elge turaqty túrde berilip otyrady», dedi ol.
Sońynda Qasym-Jomart Toqaev dıplomattarǵa tabys tilep, memleket jáne úkimet basshylaryna sálemin jetkizdi.
