Taraptar Qazaqstannyń munaı-gaz hımııasy ónerkásibinde iri ınvestısııalyq jobalardy – polıpropılen jáne polıetılen óndirisin birlesip iske asyrý máselelerin talqylady.
Atyraý qalasyndaǵy ıntegrasııalanǵan gaz-hımııa kesheniniń bazasynda 2022 jyldyń basynda qýaty jylyna 500 myń tonna polıpropılen óndiretin birlesken kásiporyn ashý josparlanǵan.
Aldaǵy ýaqytta qýaty jylyna 1,25 mln tonna polıetılen óndiretin zaýyt qurylysynyń birlesken jobasy iske asyrylatyn bolady.
«Atalǵan jobalar boıynsha yntymaqtastyqtyń bazalyq sharttary aıasyndaǵy kelisimge KAZENERGY XIV Eýrazııalyq forýmy sheńberinde SIBÝR, «Samuryq-Qazyna» AQ jáne «QazMunaıGaz» UK» AQ arasynda qol qoıyldy», dep habarlaıdy Úkimet basshysynyń resmı saıty.
A. Mamın men D. Konov Qarashyǵanaq ken ornynda birlesken munaı-gaz hımııasy jobalaryn iske asyrý, SIBÝR kásiporyndarynda qazaqstandyq mamandardy daıarlaý perspektıvasyn jáne ózara is-qımyldyń basqa da máselelerin talqylady.
Aıta keteıik, SIBÝR – shtatynda 18 myńnan astam adam jumys isteıtin, Shyǵys Eýropadaǵy eń iri munaı-gaz hımııasy holdıngi. Jylyna 2,5 mln tonna bazalyq polımer shyǵaratyn ZapSıbNeftehım munaı-hımııa kesheni qurylysynyń jobasyn júzege asyrdy. Sinopec-pen birge qýaty jylyna 2,7 mln tonna polıetılen men polıpropılendi quraıtyn Amýr gaz hımııasy kesheniniń qurylysyn júrgizip jatyr.
Kezdesýge energetıka mınıstri Maǵzum Myrzaǵalıev, «Samuryq-Qazyna» AQ basqarma tóraǵasy Almasadam Sátqalıev, «QazMunaıGaz» UK» AQ basqarma tóraǵasy Alık Aıdarbaev jáne t. b. qatysty.
