Máskeýdegi Olımpııa stadıonynda ótetin Kreml kýbogy jolyndaǵy jarystyń 31 jyldyq tarıhy bar. О́tken ǵasyrdyń toqsanynshy jyldarynyń basynda tusaýy kesilgen týrnırdiń alǵashqy ekeýinde kort qojaıyny Andreı Cherkasovtyń asyǵy alshysynan tústi. Al aıtýly dodada eń kóp oljaǵa kenelgen Reseıdiń juldyzy Evgenıı Kafelnıkov ekenin sportsúıer qaýym jaqsy bilýge tıis. 1997-2001 jyldar aralyǵynda ol bes ret bas júldeni oljalady. HHI ǵasyrdyń basynda Nıkolaı Davydenkonyń dáýiri júrdi. Ol úsh ret teńdessiz dep tanyldy. Áıelder saıysynda eki retten top jarǵan úsh tennısshi bar. Olar – reseılik Anastasııa Myskına (2003, 2004) men Svetlana Kýznesova (2015, 2016) jáne fransııalyq Marı Pırs (1998, 2005). Qazaqstandyqtar arasynda eń úzdik kórsetkishke Mıhaıl Kýkýshkın qol jetkizdi. 2013 jyly jalaýy jelbiregen jarysta jerlesimiz aqtyq synǵa deıin alqynbaı jetip, sheshýshi tusta Fransııanyń myqtysy Rıshar Gaskege ese jiberdi. Sondaı-aq 2011 jyly amerıkalyq Vanıa Kıngpen jup quraǵan Iаroslava Shvedova osy týrnırdiń jeńimpazy atandy.
Qazirgi kezde Kreml kýbogynyń júlde qory 1 345 045 AQSh dollaryn qurap otyr.
16-24 qazan aralyǵynda ótetin jarysta elimizdiń erler men áıelder arasyndaǵy birinshi raketkalary Aleksandr Býlık pen Elena Rybakına óner kórsetedi.
Neva jaǵalaýynda St. Petersburg Open dodasy ótedi. Atalǵan jarys 1995 jyldan beri úzdiksiz uıymdastyrylyp keledi. Tusaýkeser týrnırde Evgenıı Kafelnıkov qarsylas shydatpady. Eń nátıjeli óner kórsetken oıynshylar kóshin reseılik Marat Safın (2000, 2001), shvesııalyq Tomas Iýhansson (1997, 2005) jáne ulybrıtanııalyq Endı Marreı (2007, 2008) syndy sańlaqtar bastap tur. Olar eki retten dara shyqty.
Kezinde bul jarysta qazaqstandyq tennısshilerdiń de baq juldyzy janǵanyn aıta ketsek, esh aıyby joq dep oılaımyz. Máselen, 2008 jyly Andreı Golýbev aqtyq saıysqa joldama aldy. Alaıda sheshýshi synda ol Endı Marreıge ese jiberdi. 2010 jyly Mıhaıl Kýkýshkınniń qarqynyna eshkim shydamady. Jerlesimiz fınalda kort qojaıyny Mıhaıl Iýjnyıdy san soqtyrdy.
Qazaqstannyń eki-úsh tennısshisi 24-31 qazan aralyǵynda «Sıbýr Arenada» ótetin dúbirli dodada kúsh synasamyz dep qulshynyp otyr. Sebebi júlde qory 1 399 370 AQSh dollaryn quraıtyn St. Petersburg Open dodasynda tabysty óner kórsetý qaı tennısshige bolsa da úlken mártebe.
