Jıyn barysynda N.Noǵaev qala salýda qarapaıym talaptardyń saqtalmaı otyrǵanyn synǵa alyp, Aqtaý qalasynyń ákimine, oblystyq qurylys basqarmasy men qala qurylysy jáne jerdi baqylaý basqarmasynyń basshylaryna tekserý júrgizip, qurylystardyń bas josparǵa saı oryndalýyn qamtamasyz etýdi tapsyrdy.
– Halyq jekelegen shaǵyn aýdandarda qurylystardyń óte tyǵyz salynyp jatqanyn aıtýda. Turǵyndardan jańa shaǵyn aýdandarda mektep pen balabaqshalardyń joqtyǵyna qatysty shaǵym da kóptep túsýde. Olar balalaryn qaıda aparady? Túsinemin, sizder paıda tapqylaryńyz keledi, biraq olaı bolmaıdy ǵoı. Bul úılerdi turǵyzǵanda ne oıladyńyzdar? Qala qurylysynyń retsiz salynýy – birinshi kezekte halyqty qurmettemeý. Sonymen qatar óńirde keıbir nysandardyń jobalyq-smetalyq qujatynsyz salynyp jatqany týraly aqparat bar. Qalaǵan jerge záýlim saraı kótere bersek, bas jospardyń qajeti ne? Barlyq qurylys zań aıasynda júrgizilýi tıis. Bul jaýapty organdardyń ózara zańsyz kelisiminiń nátıjesi. Máseleni anyqtap, tıisti shara qabyldaýdy tapsyramyn, – dedi óńir basshysy.
Jıynda kóterilgen taǵy bir ózekti jaıt – úleskerler máselesi.
– Keıbir qurylys kompanııalarynyń jaýapsyzdyǵynan turǵyndar zardap shegýde. Alaıaq kompanııalardyń arbaýyna túsken júzdegen adam baspanasyz qalamyz ba dep qaýiptenedi. Maǵan, meniń áriptesterime qurylysshylarǵa úılerdi aıaqtaýdy mindetteýdi surap kúnine birneshe adam habarlasady. Qolmen jasaǵandy moıyndaryńyzben kóterińizder. Shamalaryńyz kelmese mindetteme almańyzdar. Osyndaı máseleniń aldyn alý úshin jergilikti atqarýshy organdar men quqyq qorǵaý organdarynyń basshylarynda barlyq múmkindik bar. Jumys júrgizińizder, – dedi N.Noǵaev.
Oblys ákimi sondaı-aq Prezıdent tapsyrmasyna saı ıgerilmeı jatqan jerlerdi memleketke qaıtarý qajettigin aıtty. Osy oraıda orynbasaryna oblys kólemindegi bos jerlerge monıtorıng júrgizip, keri qaıtarýdy tapsyrdy. Zań aıasynda áreket etip, bul máselede bosańsýǵa bolmaıtynyn málimdedi.
– Turǵyndar tarapynan Shetpe mańyndaǵy karerge qatysty da shaǵym tústi. Qıyrshyq tas óndiretin karerlerden shań kóterilip, adam densaýlyǵyna zııan keltirip jatqanyn aıtýda. Tekserý júrgizińizder. Munda prokýratýra ókilderi otyr, solarmen birlesip, zań aıasynda tıisti shara qoldanyńyzdar, – dep qorytyndylady N.Noǵaev.
Jıynda kóterilgen máseleler turǵyndar jyldar boıy sheshimin tappaı júrgen túıtkilder bolatyn. Berilgen tapsyrmalar qordalanǵan máselelerge qozǵaý salady dep oılaımyz.
