Úkimet • 26 Qazan, 2021

Qazaqstan táliptermen saıası kelissóz júrgize me? SIM jaýaby

76 ret kórsetildi

Premer-Mınıstrdiń orynbasary – Syrtqy ister mınıstri Muhtar Tileýberdi Qazaqstannyń «Talıban» qozǵalysymen qarym-qatynasy týraly aıtty, dep habarlaıdy Egemen.kz.

Úkimet otyrysynan keıin jýrnalıster suraǵyna jaýap bergen Tileýberdi Aýǵanstannyń jańa basshylyǵyn halyqaralyq qaýymdastyq áli moıyndamaǵanyn, óıtkeni «Talıban» qozǵalysy BUU-nyń lańkestik uıymdar tizimine engizilgenin basa aıtty.

«Moıyndaý úshin BUU Qaýipsizdik Keńesi arnaıy qarar qabyldaýy kerek», dedi ol.

Premer-Mınıstr orynbasarynan áleýmettik jelilerde taraǵan Syrtqy ister mınıstrligi ókiliniń táliptermen túsken sýreti neni bildiretini de suraldy.
 
«Ol Prezıdenttiń halyqaralyq ister jónindegi arnaıy ókili bastaǵan qazaqstandyq delegasııa quramynda boldy. Delegasııa Aýǵanstanǵa gýmanıtarlyq kómek kórsetý boıynsha arnaıy mıssııada bardy. Halyqaralyq qoǵamdastyqta ekonomıkalyq kúıreýge, Aýǵanstandaǵy gýmanıtarlyq daǵdarysqa jol bermeý týraly ortaq túsinik bar. Bul belgili bir qaýipterdi týdyrady. Eń aldymen, bul esirtki tasmalynyń, dinı ekstremızmniń kóbeıýi jáne bosqyndar aǵynyn týdyrýy múmkin», dep jaýap berdi Tileýberdi.

Onyń aıtýynsha, Qazaqstannyń Aýǵanstanmen qarym-qatynasy gýmanıtarlyq kómek kórsetý jáne «Aýǵanstan ekonomıkasynyń quldyraýyna jol bermeý úshin» jańa ekonomıkalyq baılanystar ornatýdan turady.

«Bári ekonomıkalyq daǵdarys bolýy múmkin ekenin túsinedi, óıtkeni Aýǵanstan úkimetiniń halyqaralyq esep-shottary jabylǵan. Eger ekonomıkalyq kúıreý bolsa, ol eń aldymen dinı ekstremızm kóterilisine baılanysty belgili bir qaýip-qater tóndiretin gýmanıtarlyq daǵdarysqa, esirtki tasymaly men bosqyndar aǵynynyń kóbeıýine ákeledi. Onyń aldyn alý úshin búkil halyqaralyq qaýymdastyq qazir aýǵan halqyna gýmanıtarlyq kómek kórsetýge shaqyryp jatyr», dep qosty Muhtar Tileýberdi.

Syrtqy ister mınıstri Qazaqstan Aýǵanstan halqyna gýmanıtarlyq kómek retinde 5 myń tonna un jiberý týraly sheshim qabyldaǵanyn aıtty.

«Basqa da kómek kórsetý týraly másele joq. Bir ǵana másele, Aýǵanstan eli qazaqstandyq QazVaq vaksınasyn jetkizý túrinde gýmanıtarlyq kómek surady. Bul qarastyrylyp jatyr, sheshimdi úkimet qabyldaıdy. Árıne, bul elmen saýda-ekonomıkalyq baılanystardy qalpyna keltirý qajet. Saıası kelissóz júrgizý týraly oıymyz joq. Áńgime aýǵan halqyna kómektesý týraly bolyp otyr», dep qosty Premer-Mınıstrdiń orynbasary.

Sońǵy jańalyqtar

Almaty qalpyna keltirilýde

Aımaqtar • Keshe

Dalanyń dara kúıshisi

О́ner • Keshe

Uqsas jańalyqtar