Sharshy alańda 15 kezdesý ótkizip, qarsylastarynyń barlyǵynan aılasyn asyrǵan qazaqstandyq bylǵary qolǵap sheberi Aıdos Erbosynuly kelesi jyly álemniń eks-chempıony, reseılik Fedor Chýdınovpen qolǵap túıistirýi yqtımal. Kásipqoı rıngte shyn myqtylarmen judyryqtasyp kórmegen Aıdos úshin Fedor Chýdınov ońaı qarsylas bolmaıtyny anyq.
Eks álem chempıonyn Aıdostyń burynǵy qarsylastarymen salystyratyn bolsaq, kádimgideı ózge ǵalamsharlyq deýge de bolady. О́ıtkeni ol áli de myqty boksshy. Tájirıbesi de jetkilikti. Eger bul aqparat resmı rastalsa, Chýdınov qazaq sańlaǵy úshin jańa deńgeıdegi qarsylas bolatyny túsinikti.
«Tún qasqyry» degen laqap aty bar Chýdınov ekinshi orta salmaqta WBA tujyrymy boıynsha álem chempıony ataǵyn eki jyl boıy saqtaǵan. «Men artyq sóz aıtpaımyn. Rıngte men úshin judyryqtarym sóıleıdi» degen ustanymdaǵy onyń qorǵanysy da myǵym, amerıkalyq stılde jaqsy judyryqtasady.
Eger otandasymyz Chýdınovpen kezdesetin bolsa, myqtap daıyndalýy kerek. Chýdınov – Erbosynulynyń qaı deńgeıdegi boksshy ekenin anyqtap bere alady. Sharshy alańda joldary túıisip, jeńiske jetse, Aıdos óz salmaǵynyń myqtylarymen judyryqtasýǵa daıyn degen sóz.
