Bul týraly Polisia.kz saıty málim etti.
Jyl saıyn 1 qyrkúıekten 1 qarashaǵa deıin Jambyl oblysy Polısııa departamenti Ákimshilik polısııa basqarmasy jol jáne tehnıkalyq ınspeksııasynyń qyzmetkerleri múddeli qyzmettermen birlesip, avtomobıl joldaryna keshendi kúzgi tekserý júrgizedi.
Jol qozǵalysy qaýipsizdigin qamtamasyz etý maqsatynda Jambyl oblysy PD ÁPB qyzmetkerleri aǵymdaǵy jyldyń 7-20 qazan aralyǵynda «Jambyl oblysy ákimdiginiń jolaýshylar kóligi jáne avtomobıl joldary basqarmasy» jáne «Jol aktıvteriniń ulttyq sapa ortalyǵy», «QazAvtoJol» Ulttyq kompanııasy Aksıonerlik qoǵamynyń Jambyl oblystyq fılıaly jáne «Qazaqavtodor» jaýapkershiligi shekteýli seriktestigi Jambyl oblystyq fılıalynyń ókilderimen birlesip, oblys aýmaǵyn qamtıtyn oblystyq (1941,93 shq) jáne respýblıkalyq (1196 shq) mańyzy bar avtomobıl joldary keshendi tekserildi.
«Tekserý barysynda oblystyq mańyzy bar joldarda 639 kemshilik, respýblıkalyq mańyzy bar joldarda 762 kemshilik – jol belgileriniń bolmaýy jáne standart talaptaryna sáıkes kelmeýi, asfaltbeton jabynynyń buzylýlary, shuńqyrlyqtar anyqtaldy. Kúzgi keshendi tekseris qorytyndysy boıynsha, Jambyl oblysy ákimdiginiń jolaýshylar kóligi jáne avtomobıl joldary basqarmasyna anyqtalǵan kemshilikterdi joıý boıynsha 37 jazbasha nusqama, al «QazAvtoJol» UK AQ-nyń Jambyl oblystyq fılıalyna 12 nusqama berildi», dep málimdedi Jambyl oblysy PD ÁPB bastyǵy Jaıdarbek Quttybaev.
Oblystyq jáne respýblıkalyq mańyzy bar avtomobıl joldaryn qanaǵattanarlyqsyz kútip-ustaǵany jáne jol qozǵalysy qaýipsizdigin qamtamasyz etpegeni úshin atalǵan joldarǵa jaýapty merdiger uıymdardyń 12 laýazymdy tulǵasy Qazaqstan Respýblıkasy ÁQBtK-niń 631-baby 1-bóligine sáıkes ákimshilik jaýapkershilikke tartyldy.
Osy jyldyń toǵyz aıynda jalpy oblys boıynsha joldardy qanaǵattanarlyqsyz ustaǵany úshin 190 laýazymdy tulǵa ákimshilik jaýapkershilikke tartyldy.
Qazirgi ýaqytta jol qozǵalysynyń qaýipsizdigi jáne ótkizý qabiletin arttyrý maqsatynda jergilikti atqarýshy organdarmen ártúrli deńgeıdegi jaıaý júrginshiler ótkelderin salý, qoldanystaǵy kóshelerdi keńeıtý, tosqaýyl qorshaýyn ornata otyryp, magıstraldyq kóshelerdi bólý jolaqtarymen jaılastyrý máseleleri pysyqtalýda. Jol qozǵalysy qaýipsizdigin qamtamasyz etý jumystary Jambyl oblysy Polısııa departamenti basshylyǵynyń turaqty baqylaýynda.
