Oblys ortalyqtarynyń ishinde Túrkistan qalasynda birinshi bolyp halyq sanaǵy aıasynda úılerdi aralaý jumystary aıaqtalǵan. Munda 220 553 respondent saýalnamadan ótti nemese qamtý kórsetkishi 118%-i quraǵan. О́ńirde sondaı-aq, Kentaý men Arys qalalary da sanaq aıasyndaǵy saýalnama jumystaryn támamdady.
Almaty oblysynyń Tekeli qalasy da saýal salý sharalaryn aıaqtaǵan eldi mekenderdiń qataryna endi. Munda respondentter sany 29 509 (100,1%) adamdy quraǵan.
Qaraǵandy oblysynyń Nura aýdany da saýalnama júrgizý kezeńin aıaqtap, respondentter sanyn shyǵarǵan. Olardyń qatary 21 837 nemese 1 tamyzdaǵy jaǵdaı boıynsha halyq sanynyń 99,4%-in qurady.
Al Qyzylorda oblysyndaǵy Baıqońyr qalasy men barlyq aýdandar (Aral, Jalaǵash, Jańaqorǵan, Qazaly, Qarmaqshy, Syrdarııa, Shıeli) sanaq aıasynda saýalnama júrgizý sharalaryn aıaqtaǵan. Baıqońyrda 1 tamyzdaǵy derekke sáıkes, halqynyń sany 39548 adamdy qurasa, saýal salý nátıjesinde 39 622-ge (100,2%) jetkeni belgili boldy. Saýalnama kezeńin aıaqtaǵan eldi mekenderde naqtylaý sharalary qosymsha júrgiziletin bolady.
28 qazandaǵy jaǵdaı boıynsha halyqty sanaqpen qamtý kórsetkishi 18 663 838 adamǵa nemese 98,1%-ke jetti. Qamtý kórsetkishi boıynsha Almaty qalasy kósh basynda – 108,9%. Iаǵnı, 1 tamyzdaǵy jaǵdaı boıynsha megapolıste turaqty turatyndardyń sany 2 005 496 adamdy quraǵan. Onlaın sanaq pen ıntervıýerler júrgizgen saýalnamanyń aralyq nátıjeleri qazirgi ýaqytta qalada 2 183 534 respondent bar ekenin kórsetti.
Saýal salý jumystary áli de jalǵasýda. Osyǵan uqsas jaǵdaı Jambyl (102,2%), Almaty (102,1%), Túrkistan (101,5%), Shyǵys Qazaqstan (101,1%) oblystary men Shymkent (101,4%) qalasynda qalyptasty. Bul óńirlerde de sanaq jumystary aıaqtalǵan joq. 2021 jylǵy Ulttyq sanaqtyń negizgi kezeńi Qazaqstanda 1 qyrkúıekten 30 qazanǵa deıin ótýde. Qarashanyń 8-ne deıin sanaq ótkizý ádistemesine sáıkes, naqtylaý sharalary qarastyrylǵan.
