Adamdardan árdaıym alǵys pen bata alady

Erekshe qajettiligi bar adamdarǵa memleket qamqorlyǵy qaı kezde de aýa­daı qajet. Olardy ómirge beıimdeý, eńbekke yntalandyrý, keshendi kómek kórsetýdiń mańyzy zor. Osy maqsatta iske asqan aıshyqty jobanyń biri – Belsendi uzaq ómir súrý ortalyqtary. Búgingi tańda Almatyda mundaı birneshe ujym qarııalarǵa úzdiksiz qoldaý kór­se­týmen aınalysyp otyr. Medeý aýdanyna qarasty Belsendi uzaq ómir súrý ortalyǵynyń jas mamany Áıgerim Shyńǵysqyzy óz qyzmetine qatysty oıymen bólisti.

– Birer jyldan beri osy ortalyqta jumys isteımin. Qarttar da bala sııaq­ty. Olarǵa erekshe kóńil bólý ke­rek. Ortalyǵymyzǵa kelýshiler án aıtyp, shahmat oınaıdy, saýyqtyrý jattyǵýlaryn jasaıdy, ózara syr-suhbat quryp túrli taqyrypta áńgime órbitedi. Kópshilik adamdar zeınetke shyqqanda ózin qoǵamnan alshaqtap qalǵandaı sezinedi. Bul bir jaǵynan psıhologııalyq soqqy, sol sebepten de olar ózin qurdymǵa tastap jiberýi múmkin. О́ıtkeni bári birdeı úıinde nemeresin baǵyp, túrli demalys oryndaryna baryp ómirin ózi qalaǵandaı ótkizip jatqan joq. Ásirese qalalyq jerdegi páterlerde turatyn qarttar tańnan keshke deıin tórt qabyrǵaǵa telmirip otyrǵysy kelmeıdi. О́zine qolaıly orta izdeıdi, teń qurbysymen syrlasqysy keledi. Olardyń árbiriniń pikirin tyń­dap, barynsha qolaıly jaǵdaı jasaýǵa tyrysamyz. Bizdiń ujymdaǵy barlyq áleýmettik qyzmetker jumysyna jaýapkershilikpen qaraıdy. О́z kásibimdi jaqsy kóremin, bul bir jaǵynan adal tabys bolsa, ekinshi jaǵynan saýapty is dep oılaımyn. О́ıtkeni úlken kisilerden kúnde alǵys pen bata alamyz, – deıdi Áıgerim Shyńǵysqyzy.

Almaty – elimizdiń mádenı ortalyǵy. Sol sebepti de megapolıste múmkindigi shekteýli shyǵarmashylyq adamdaryn qoldaýǵa baǵyttalǵan sharalar jıi ótedi. Ásirese qalada sýret ónerine áýestenetin jandardyń kóp ekenin eskersek, olarǵa rýhanı medet berý mańyzdy is. Jýyrda osyndaı ıgi bastama Á.Qasteev atyndaǵy óner mýzeıinde qanat qaqty. Resmı derekke súıensek, elimizde estý men kórý qabiletinen aıyrylǵan 18 myń adam ómir súrip jatyr. Irgeli óner oshaǵynda kórý men estý qabileti nashar azamattar úshin sýbtıtri bar ym-ıshara tilindegi beıne-ekskýrsııalar jobasy iske qosyldy. Janary jarqyrap turmaǵanymen, estý men kórý qabileti nashar tulǵalarǵa erekshe sezgirlik qabilet beriledi degendi talaı márte estigenbiz. Bul da jaratylystyń sheksiz ádildigin áıgilep turǵandaı. Mundaı tulǵalarǵa bilim berý, rýhanı damytý taqyrybynyń kókjıegi keńeıe berse deısiń.

– Kezekti jobamyz mýzeı bazasynda qazaq jáne orys tilinde jaryq kórdi. Maqsatymyz – aıryqsha nazar aýdarýdy qajet etetin kelýshilerimizge qoljetimdi beıneekskýrsııalar uıymdastyrý. Olar­ǵa da óner qoljetimdi bolýy kerek. Atalǵan sanattaǵy balalar men jasóspirimderge mýzeı kolleksııasyn tanystyrý arqyly áleýmettendirý, sol arqyly otandastarymyzdy áleýmettik-mádenı ómirge tartýdy kózdeımiz. Osy jobany iske asyrý arqyly biz shyǵarmashylyq jáne kórkemdik uıymdardyń nazaryn estý qabileti buzylǵan adamdardyń, ásirese, balalar men jasóspirimderdiń problemalaryna aýdarýǵa nıettimiz, – deıdi mýzeı qyzmetkeri Aqbota Álimǵojına.

Búginde múmkindigi shekteýli jan­dar­ǵa memlekettik qyzmet kórsetý men olardy jumyspen qamtý mańyzdy másele. Aıtalyq, «Azamattarǵa arnalǵan úki­met» memlekettik korporasııasynyń Alma­ty fılıalynda jetpiske tarta múmkindigi shekteýli jan jumys isteıdi.

«Múgedekter úshin kóptegen qyzmetti onlaın rejimde alý qarastyrylǵan. Máselen, azamat múgedektik tobyn anyq­taý úshin komıssııadan ótkende, basqa esh jerge júginýdiń qajeti joq. Onyń qujattary onlaın rejimde mem­lekettik korporasııaǵa berilip, osyn­da barlyq járdemaqy men tólem­ túri belgilenip, onyń tólenýi uıym­das­tyrylady. Maman­da­rymyz jarty jylda 1 737 úıge baryp 2 myńǵa jýyq qyzmet kórsetti», deıdi mekemeniń baspasóz qyzmeti.

Aıryqsha qamqorlyqty qajet etetin azamattarǵa qyzmet kórsetý sapasy ta­lapqa saı bolǵany abzal. Bul taqy­ryp kámeletke tolmaǵandarmen jumys máse­leleri jónindegi jedel áreket etý shtabynyń kúni keshe ótken otyrysynda da keńinen talqylandy. Almatynyń bilim basqarmasy orta bilim berý uıym­darynyń bazasynda jumys isteı­tin psıhologııalyq qyzmetter jumy­synyń tıimdiligin arttyrý boıynsha sholý júrgizdi. Megapolıstiń 207 mektebinde 365 psıholog, 207 áleýmettik pedagog jumys isteıdi. 286 psıholog kámeletke tolmaǵandarmen qarym-qatynastyń jańa formattaryna saı oqytylyp, olarǵa jan-jaqty qoldaý kórsetilmek.