Bıyl úshinshi ret uıymdastyrylǵan sharanyń ashylý saltanatyna Aqparat jáne qoǵamdyq damý vıse-mınıstri Bolat Tilepov, Májilis depýtaty, aqyn Maqpal Tájmaǵambetova, ardager rejısser-mýltıplıkator Tamara Muqanova, Túrkistan oblysy ákiminiń orynbasary Ulan Tájibaev, «Rýhanı jańǵyrý» qoǵamdyq damý ınstıtýty Basqarma Tóraǵasynyń orynbasary Amanbek Tólepbergenov, Nur Otan partııasy Túrkistan oblystyq fılıaly tóraǵasynyń birinshi orynbasary Beısen Tájibaev, Halyqaralyq qazaq-túrik ýnıversıtetiniń basshylyǵy syndy memleket jáne qoǵam qaıratkerleri qatysty. Sonymen qatar, bilikti túrik anımasııa rejısseri Mýsab Gúndúz ben zamanaýı komıks sýretshisi Mustafa Ahmet Qara, óner tarlany tanymal Júsip Aqshora jáne ánshi Ushqyn Jamalbek te festıval tórinen kórindi.
Saltanatty jıynda sóz alǵan qonaqtar qatysýshylardy shyn júrekten quttyqtap, kınofestıval jumysyna sáttilik tiledi. Sonymen qatar, ardager rejısser Tamara Muqanova qazaq anımasııa óneriniń damýyna sińirgen eren eńbegi men nasıhatyna qosqan zor úlesi úshin Halyqaralyq ÁMEN anımasııalyq fılmder festıvaliniń qurmet dıplomymen marapattaldy.
Otandyq jáne baýyrlas túrki elderdiń, atap aıtqanda Ázerbaıjan, Bashqurtstan (RF), Qyrǵyzstan, О́zbekstan, Tatarstan (RF), Tájikstan men Túrkııanyń bilikti mýltıplıkatorlary Ortalyq Azııadaǵy eń iri anımasııalyq festıvaldiń qyzyl kilemimen júrip ótti.
Bıyl baıqaýǵa barlyǵy 57 ótinim kelip tústi, onyń 49-y irikteýden ótip, áıgili shetel anımator-mýltıplıkatorlary men otandyq bilikti mamandardyń baǵasyn alady. Olardyń qatarynda álemge tanymal sýretshi-anımator, «Ný, pogodı!», «Mýlan», «Korol lev», «Fıksıkı» syndy «Soıýzmýltfılm» men Disney stýdııalarynyń 40-tan asa jobasyna qatysqan Aleksandr Dorogov, QR Memlekettik syılyǵynyń ıegeri Roza Muqanova, kınotanýshy, kınosynshy Názıra Muqysheva, Ulttyq kınony qoldaý ortalyǵynyń bas prodıýseri Adaı Ábeldınov, anımasııa prodıýseri jáne rejısser Mýsab Gúndúz, rejısser-ssenarıst, QR Mádenıet qaıratkeri, rejısser-mýltıplıkator Batyrhan Dáýrenbekov, sondaı aq halyqaralyq kınofestıvalderdiń júldegeri Turdybek Maıdan bar.
Aıta keterligi, festıval jumysy eki kúnge sozylady. Uıymdastyrýshylardyń aıtýynsha, shara aıasynda qala kórermenderi túrki elderiniń úzdik mýltfılmderin tegin tamashalap qana qoımaı, anımasııalyq joba jasaýdyń qyr-syryna qanyǵady.
