Qazaqstan Respýblıkasynyń aýmaǵynda koronavırýs ınfeksııasynyń paıda bolýy men taralýyna jol bermeý jónindegi vedomstvoaralyq komıssııanyń 2021 jylǵy 21 qyrkúıektegi sheshimine sáıkes Qazaqstan men Ázerbaıjan arasyndaǵy turaqty áýe qatynasy qalpyna keltirilýde.
Atap aıtqanda, 2021 jylǵy 7 qarashadan bastap «Air Astana» áýe kompanııasy «Embraer E190 – E2» áýe kemesimen Almaty-Baký baǵytynda ushýdy josparlap otyr. Reıs aptasyna 2 ret – beısenbi jáne jeksenbi kúnderi oryndalady.
Sonymen qatar, «Ázerbaıjan Hava Iollary» áýe kompanııasy 2021 jylǵy 6 qarashadan bastap «A – 319» áýe kemesimen Almaty-Baký baǵytynda usha bastaıdy. Reıs aptasyna 1 ret – senbi kúni oryndalady.
«Ázerbaıjanmen aradaǵy áýe reısteriniń sanyn arttyrý epıdemıologııalyq jaǵdaıǵa, vedomstvoaralyq komıssııanyń sheshimderine jáne Ázerbaıjannyń tıisti memlekettik organdarynyń sheshimderine baılanysty qabyldanady. Reıster sanıtarlyq-epıdemıologııalyq talaptardy qatań saqtaı otyryp jáne áýe kompanııalarynyń saıtynda jarııalanǵan kestege sáıkes oryndalady», delingen mınıstrlik saıtynda.
