Makron men Morrıson eki eldiń qarym-qatynasyndaǵy daǵdarys bastalǵannan beri alǵash ret telefon arqyly sóılesti.
Fransýz kóshbasshysy Kanberra qarym-qatynastyń jańa anyqtamasy boıynsha naqty áreketterdi usynýy kerek ekenin atap ótti. Onyń aıtýynsha, Fransııamen súńgýir qaıyqtar týraly kelisimshartty buzý jaıly sheshim elder arasyndaǵy senimge nuqsan keltirgen.
«Men ony anyq bilemin», dedi Makron avstralııalyq jýrnalıst Bıven Shıldstiń «Úlken jıyrmalyq» sammıti aıasynda «Avstralııa premer-mınıstri ótirik aıtty ma?» degen suraǵyna ún qatyp. Sonymen birge Makron Avstralııa halqyn qurmetteıtinin atap ótti.
«Biz onyń (Morrıson - red.) ne isteıtinin kóremiz... Men jaı ǵana bir dúnıeni aıtqym keledi: bireýdi qurmettegen kezde siz shynaıy bolýyńyz kerek jáne osy qundylyqqa sáıkes áreket etýińiz qajet», dep atap ótti Makron «Qazir Avstralııa premer - mınıstrine sene alasyz ba?» degen suraqqa jaýap berip.
О́z sózinde Avstralııa premer-mınıstri ótirik aıtpaǵanyn jáne Makronǵa maýsym aıynda Naval Group fransýz kompanııasynyń sýasty qaıyqtary eldiń qajettilikterin qanaǵattandyrmaıtynyn jetkizgenin tiline tıek etti.
Fransııamen jasalǵan kelisim Barracuda klasty 12 soqqy sýasty qaıyqtaryn óndirýdi qarastyrdy. Fransııanyń Syrtqy ister mınıstri Jan-Iv Le Drıan Avstralııanyń kelisimdi buzý týraly sheshimin «arttan jasalǵan soqqy» dep ataǵan bolatyn.
