«Ańsaǵan sábıdiń» tuńǵyshy

Mınıstrdiń aıtýynsha, «Ań­sa­ǵan sábı» baǵdarlamasy bo­ıynsha sátti jasalǵan ekstrakorporaldy uryqtandyrý (EKU)  nátıjesinde 15 qazan­da al­ǵashqy náresteniń kindigi ke­sil­di. Osylaısha, Qazaq­stan­nyń reprodýktıvti medısına qaýym­das­tyǵy elimizde EKU ar­qyly dú­nıege kelgen bala­lar­dyń sany 25 myńǵa jetkenin málimdedi.

Talǵar aýdany Taldybulaq aýylynda turatyn Dana toǵyz jyldan beri bala súıe almaı, Reprodýktıvti medısına ınstıtýtyna júgingen. Ol «Jas-Aı» medısına ortalyǵynda aǵa medbıke bolyp jumys isteıdi. Al kúıeýi Qýandyqtyń mamandyǵy – elektrık. Jubaılar uzaq ýaqyt boıy qarjylyq jaǵdaıyna baılanysty EKU jasata almaı kelgen eken.

Erli-zaıyptylarǵa «Ańsaǵan sábı baǵdarlamasynyń kvotasy boıynsha EKU kómegimen júktilikti josparlaý usynyldy. Osylaısha, áıel adam dáriger Aıaýlym Kosetovanyń qaraýynda bol­ǵan. Alǵashqy talpynystan keıin-aq boıyna bala bitken Dana qazannyń ortasynda №1 qalalyq perzenthanada bosandy. Jaryq dúnıe esigin ash­qan náresteniń salmaǵy – 3,156 kg jáne boıy – 52 sm. Al ań­sa­ǵan sá­bıdiń esimi Arman dep qo­ıyl­dy.

Osy oraıda Prezıdent byl­tyrǵy Joldaýynda Úkimetke 2021 jyldan bastap «Ańsaǵan sábı» arnaýly baǵdarlamasyn júzege asyrýdy tapsyryp, EKU baǵdarlamalary boıynsha bóli­netin kvota sany 7 myńǵa deıin, ıaǵnı 7 ese ulǵaıǵanyn atap ótken jón. Bul rette osyǵan deıin EKU-ǵa jyl saıyn 900-1000 kvo­ta bólinip kelgenin atap ótken jón. Jalpy, EKU prosesi 2010 jyl­dan beri tegin medısınalyq kó­mektiń kepildik berilgen kóle­mi­ne qosylǵan.

Búgingi tańda «Ańsaǵan sábı» baǵ­dar­lamasyn sátti júzege asy­rý maqsatynda bala kóte­rý­ge qa­biletti jastaǵy áıel­der men erlerdiń sanyn, buǵan qa­­tys­ty oblystar men qala­lar­­daǵy jaǵdaıdy eskere otyryp, EKU-nyń 7 myń kvotasyn bólý júrgizildi. Respýblıkalyq elektrondy densaýlyq saqtaý orta­lyǵy usynǵan aqparat bo­ıyn­sha bıyl 15 qyrkúıekte 5 980 (85%) pasıent QRT baǵ­dar­la­malaryn júrgizýge joldama aldy, onyń ishinde 4 345 pasıentke EKU jasaldy, sondaı-aq 1 361 prosess bastaldy.