Sonyń ishinde 2019 jyly 51 tekseris júrgizilip, 10,9 mln teńgege, 2020 jyly 93 tekseris júrgizilip, 23,9 mln teńgege, bıyl 10 aıda 434 tekseris júrgizilip, 99,1 mln teńgege aıyppul salynǵan.
Sonymen qatar, sapasyz qyzmet kórsetken operatorlarǵa salynatyn aıyppul kólemi 10 esege ulǵaıtylypty.
«Mınıstrlik eldegi baılanys sapasyn kóterý úshin qarqyndy jumys júrgizip jatqanyn aıtqym keledi. Sonyń ishinde shalǵaı aýyldar da bar. 250+ jobasy aıasynda (250-den astam turǵyny bar aýyl úshin) 900-den astam aýylǵa ınternet ótkizdik. Qazir -250 jobasy qaralyp jatyr. Bazalyq stansalardyń qýatyn ulǵaıtyp, tehnologııalardy jańartyp jatyrmyz. Eldi mekenderdegi ınternet sapasynyń tómengi shegin belgiledik, 4G úshin 5Mb/s, 3G - 1 Mb/s joǵary bolýy tıis. Alaıda problemalar da barshylyq, bul jaıly mınıstr ózi de ashyq aıtyp júr, sol máselelerdi sheshýge kúsh salyp jatyrmyz. Bizdiń elimiz úlken jáne ár aımaqtyń óz ereksheligi bar: dalaly, taýly, ormandy, shóldi jerler. Ár aýylǵa ınternet jelisin jetkizý ońaı sharýa emes, tipti keıbir aýyldarda joldar men turaqty elektr qýaty da joq», deıdi Sıfrlyq damý, ınnovasııalar jáne aeroǵarysh ónerkásibi mınıstrliginiń baspasóz qyzmetkeri Maqsat Tólegenov.
