Nına JÚSIPOVA, «Qazkommersbank» basqarma tóraıymy: «Otandyq bank júıesinde jaqsy saqtandyrylǵan mehanızm jumys istep tur»

Elimizdiń bank júıesi talaı qıyn kezeńdi basynan ótkergen. Atap aıtsaq, álemdik naryqtaǵy turaqsyzdyqtar, ǵalamdyq ekono­mıkalyq daǵdarys, sondaı-aq, valıýta baǵamynyń oınaqylyǵy sekildi jaǵdaılar. Endi osyndaı qıly kezeńdi basynan ótkerip, osy kúnge deıin tabysty jumys istep turǵan bankter bir-aq kúnde bankrot bolyp, óz jumysyn toqtatady degenge qalaı senesiz?! El ishinde nendeı alypqashty áńgime júrmesin, meıli múddeli toptar túrli áreketterge barsa da Qazkommersbank burynǵysha, daǵdyly jumys rejimimen halyqqa qyzmetin kórsetip otyr. Bizde nesıemen jumys isteý, jeke tulǵalardyń salymy, tólem kartalary men bankomattyq júıede esh kedergi joq jáne shubatylǵan kezekti de kórmeısiz. Osy rette men jeke salymshylarǵa áýeli óz esepshotyńyzdaǵy jınaq­talǵan qarjyny birjolata qaı­taryp almas buryn, bank qyzmetkerlerimen nemese bó­lim­she basshylarymen sóı­le­sip, aqyldasyńyzdar degim ke­ledi. Bul tek bizdiń banktiń klıentterine ǵana aıtylǵan sóz emes, otandyq barlyq bank salym­shylaryna baǵyttalǵan keńes. Olaı deıtinim, negizsiz alyp­qashty áńgimege senip salym­shylar birneshe ret shyǵynǵa ushyraǵanyn ózderi de baıqamaı jatady. Barsha otandastarymyz eskerer bir másele bar, ol – bizde, Qazaqstanda salymshylardyń qarajatyn qorǵaý nıetimen jasalǵan myzǵymas mehanızmniń jumys istep turǵanyn umyt­paıyq. Bizdegi barlyq bankter min­­detti ujymdastyrylǵan saq­­tandyrý júıesiniń múshe­leri jáne jergilikti salym­shy­lar­dyń qarjysy tolyq qam­syz­dan­dyrylǵan. Bul degenińiz, bank­ke salǵan ulttyq valıýta da, sheteldik valıýta da óz qunyn tolyq saqtap turady degen sóz. Bizdiń elimizde otyzdan asa ár deńgeıdegi bankter jumys isteıdi. Olardyń ishinde keıbir jekelegenderi uzaq ýaqyttan beri el senimine jaqsy ornyqqandar. Mine, biz únemi óz klıentterimizge eger qarjy máselesinde kú­man­danar bolsańyz, birneshe bank­ten óz esepshotyńyzdy ashyp, ártúrli valıýta túrinde saqtap kórińiz dep aıtamyz. Qazkommersbank eldegi ózge bankter sııaqty únemi ulttyq valıýtany óz deńgeıinde ustap turýǵa kúsh salady. Jáne de teńge baǵa­myna qatysty máselelerde salym­shylardyń esebi túgel bolýyna múddeli ekendigimizdi eskertkim keledi. Jazyp alǵan Qanat ESKENDIR, «Egemen Qazaqstan». ALMATY.