Absolıýtti álem chempıony ataǵy úshin tartystyń alǵashqy úsh raýndynda AQSh boksshysy sál ǵana basymdyq tanytqandaı kórindi. Desek te birte-birte «Kanelo» tizgindi óz qolyna aldy. Planttyń qarymta shabýylǵa júginýden basqa amaly qalmady. Biraq meksıkalyq marǵasqa qarqynyn kúsheıtken saıyn jergilikti boksshy jıi qatelikke uryna bastady. 11-raýndta Alvarestiń sol qoly qarsylasyna dóp tıdi. Tóreshi esep ashty. Soqqynyń qatty bolǵany sonshalyq, Plant ornynan ázer turdy. Qarsylasynyń áli de esin jııa almaı turǵanyn baıqaǵan Saýl tegeýrinin odan ári kúsheıtti. Onyń taǵy bir ekpindi shabýylynan keıin amerıkalyq boksshy qaıta qulady. Bul joly tóreshi jekpe-jekti toqtatty. Osylaısha, Saýl Alvares álemniń absolıýtti chempıony atandy.
Bul – 31 jastaǵy «Kanelonyń» kásipqoı rıngtegi 60-shy jekpe-jegi. Sonyń 57-sin ol jeńispen aıaqtap, 39 qarsylasyn esinen tandyrdy. Bir ret utylyp, taǵy eki kezdesý teń aıaqtaldy. Al 22 ret sharshy alańǵa kóterilgen Plant keshe alǵash ret jeńilistiń kermek dámin tatty. Osyǵan deıin ol 12 básekeni merziminen buryn aıaqtap, 9 kezdesýde tóreshilerdiń sheshimi boıynsha jeńiske jetken edi.
