Eki jyl boıy ǵylymı qyzmetkerler saýyqtyrý ortalyǵynyń ókilderimen birlese sıtologııa salasynda suranysqa ıe suıyqtyq quramyn ázirledi. Nátıjesinde olar buryn shetelden alynyp kelgen ónimdi óz elimizde jasap shyǵardy. Endi ǵalymdardyń bul jańashyldyqtary medısınalyq qyzmettiń qunyn tómendetýge múmkindik beredi. О́ıtkeni ol qarjylyq jaǵynan da, geografııalyq jaǵynan da qoljetimdi bola túspek. Ǵalymdardyń aıtýynsha, eritindiniń sapasy sheteldik analogtardan kem túspeıdi.
«Bizdiń ǵalymdarymyzdyń jasap shyǵarǵan týyndysy ımportty almastyrý máselesin sheshedi. Osy zertteýdiń nátıjesinde bıomaterıaldy saqtaýǵa arnalǵan bekitýshi eritindiniń ońtaıly quramy jasaldy. Bul bıomaterıaldardy turaqtandyrýǵa jáne tasymaldaýǵa múmkindik beredi, ıaǵnı onkologııalyq aýrýdy odan ári dıagnostıkalaý úshin jatyr moınyna jaqpa retinde paıdalanylady. Bul ázirlemeniń biregeıligi - qaterli isikti tez dıagnostıkalaý máselelerin keshendi túrde sheshý bolyp tabylady», dedi S.Amanjolov atyndaǵy Shyǵys Qazaqstan ýnıversıteti Ulttyq ǵylymı zerthanasynyń kishi ǵylymı qyzmetkeri Aıdana Imasheva.
Qazaqstandyq ǵalymdar toby ózderi ázirlegen bekitýshi eritindige patent aldy. Atalǵan ónim Qazaqstan Respýblıkasynyń dárilik zattar men medısınalyq buıymdar tizilimine engizildi. Qazirgi tańda joba kommersııalandyrý satysynda. Sonymen qatar ǵalymdar basqa da bıologııalyq materıaldardy saqtaý eritindisiniń quramyn jaqsartý barysynda jumys isteýdi jalǵastyrýda.
