Sapasyz ónim shyǵarǵandar jazasyz qalmaıdy

Komıtetke qarasty departamentter ónimderdiń sapasyn qadaǵalaý maq­satynda profılaktıkalyq baqy­laý jumystaryn júrgizedi. О́nimder­den alynǵan synaq materıaldaryna taldaý jasaıtyn arnaıy zerthanalar ashylǵan.

Mamandar sapasyz ónimderdi anyq­taýǵa arnalǵan memlekettik baqylaýdyń alǵashqy nátıjelerin de jarııa etti. Sonyń ishinde reglament talaptaryna saı kelmeıtin dızel otyny da bary belgili boldy. «Bıyl tıisti sapadan kórinbegen salqyndatqysh suıyqtyqty aınalymǵa shyǵarǵany úshin 6,2 mln teńge somasyna aıyppul salyndy. Sonymen qatar óndirýshige berilgen hımııalyq ónimdi tirkeý týraly kýáliktiń kúshi joıyldy», dep habarlaıdy Tehnıkalyq retteý jáne metrologııa komıtetiniń tóraǵasy Arman Ábenov.

Komıtet sáıkestikti baǵalaý týraly qujattarǵa da udaıy monıtorıng júrgizip keledi. Memlekettik kiris­ter komıtetimen birlese atqaryl­ǵan aýqymdy jumystardyń sheńberinde zańsyz sertıfıkattar da anyq­talǵan. Solar­dyń ishinde oıyn­shyq­tarǵa, jeke qor­ǵanys qural­dary­na, turmystyq elektr tehnıkasyna, tamaq jáne jeńil óner­kásip ónimderine berilgen 282 de­kla­rasııa men sertıfıkat kúshin joıǵan.

Jalpy, qazir halyqaralyq saýdada básekelestik júrip jatyr. Sáıkes­tik­ti baǵalaý qujattary adal báseke­les­tikti damytýǵa múmkindik beredi. Sondyqtan zańsyz sertıfıkattarǵa jol joq. Ár ónim sapaly ári qaýipsiz bolýymen, qujatqa sáıkes kelýimen erekshelenýi tıis. Mundaı ónimder legi álem boıynsha artyp keledi, deıdi komıtet ókilderi. Ásirese halal, organıkalyq ónimderdiń saýdasy qyzyp tur. Halyqaralyq saýda ortalyǵynyń baǵalaýy boıynsha jahandyq halal ındýstrııasy qazirgi tańda 1,37 trln dollarǵa jetken. Bul ǵalamdyq azyq-túlik pen sýsyndar naryǵynyń 18%-yn quraıdy. Pew Research Center zertteý ortalyǵynyń boljamy boıynsha mundaı ónimderdi tutynatyndardyń qatary 2050 jylǵa qaraı 2,8 mlrd-qa jetýi múmkin.

Organıkalyq ónimder naryǵy da sapasy jaǵynan halal ónim ındýs­trııasynan qalysar emes.  2000 jyldan 2019 jylǵa deıin bul salanyń ónimderi bes esege ósti. Grand View Research boljamy boıynsha naryq óz ósimin jylyna 15-16% jyldamdyqpen jalǵastyrady jáne 2025 jyly shamamen 210-230 mlrd dollardy quramaq.