Kezinde Qazaq eliniń balýandary dúbirli dodalarda san márte top jaryp, mıllıondaǵan jankúıerdiń qoshemetine bólengeni barshaǵa málim. Ásirese, grek-rım kúresi sheberleriniń qarqyny óte kúshti edi. Bizdiń elden Olımpııa oıyndarynyń jeńimpazdary men álem chempıondary kóptep shyqty. Al qazir qola medalǵa qolymyz jetse, sonyń ózine kádimgideı qýanatyn boldyq. Árıne, Qazaqstan sekildi balýandyq ónerde baı dástúri bar irgeli memleket úshin bul tym uıat jaǵdaı. Tipti «eldigimizge syn» desek te, eshkim de aıypqa buıyra qoımas.
Kúni keshe ǵana Serbııanyń astanasy – Belgradta «Beleksposentr» sport kesheninde 23 jasqa deıingi balýandar arasynda álem chempıonaty (U-23) ótti. Bul jarysta da jerlesterimiz senim údesinen shyǵa almady. Máselen, grek-rım kúresi boıynsha 10 balýanymyz baq synady. Solardyń ekeýi ǵana júldeli oryndar úshin talasty. Olar – Aslan Abdýrahmanov (55 kg) pen Sultan Ásetuly (67 kg). Biraq qola medal úshin tartysta olardyń joly bolmady. Ekeýi de Túrkııanyń tastúlekterine ese jiberdi. Aslan Adem Býrak Ýzynnan jeńilse, Sultan Kadyr Kemaldyń osal tusyn taba almady.
Atalǵan kúres túri boıynsha Reseıdiń ekipine eshkim shydaı almady. Olar 4 altyn, 1 kúmis jáne 4 qola medaldy ıelenip, jalpykomandalyq esepte kósh bastady. 2 altyny men
1 qolasy bar Grýzııa ekinshi oryndy oljalady. Úshinshi orynda – Iran. Parsy eliniń apaıtósteri 1 altyn 4 kúmis jáne 2 qolany qorjynǵa saldy. Sondaı-aq Majarstan (1+1+1), Ázerbaıjan (1+0+2 qola) jáne Germanııa (1+0+0) quramalary bas júldeni enshiledi.
Grek-rım kúresinen álem chempıony atanǵan balýandar: 50 kg – Anvar Allahıarov (Reseı), 55 kg – Mavlýd Rızmanov (Reseı), 63 kg – Lerrı Abýladze (Grýzııa), 67 kg – Hasrar Jafarov (Ázerbaıjan), 72 kg – Idrıs Ibaev (Germanııa), 77 kg – Tamash Levaı (Majarstan), 82 kg – Aıvengo Rıkadze (Grýzııa), 87 kg – Aleksandr Komarov (Reseı), 97 kg – Artýr Sargsıan (Reseı) jáne 130 kg – Amın Mırzazade (Iran).
Áıelder kúresinen ótken jarysta otandastarymyzdyń deni bastapqy básekelerinde súrindi. Tek 55 kg salmaqtaǵy Aınur Áshimova men Dilnaz Múlkinovanyń ǵana jeńis tuǵyryna kóterilýge jaqsy múmkindikteri boldy. Biraq olar sheshýshi tusta jeńilistiń kermek dámin tatty. Qola medal úshin beldesýde Aınur túrkııalyq Eda Tekınge bir ǵana upaı aıyrmashylyǵymen utylsa, Dilnaz kolýmbııalyq Tatıana Renterıge jol berdi.
Qyzdar básekesinde Ýkraına ókilderiniń mysy basym boldy. Olar 4 altyn, 2 kúmis jáne 2 qola medaldy oljalady. Balqan túbeginde Fransııa (1+1+0), Kanada (1+0+1), AQSh (1+0+1), Rýmynııa (1+0+1), Ekvador (1+0+0), Polsha jáne Qyrǵyzstannyń da (1+0+1) ánurandary shyrqaldy.
Áıelder kúresinen álem chempıony atanǵan balýandar: 50 kg –Emelı Shılson (AQSh), 53 kg – Lýsııa Gýzman (Ekvador), 55 kg – Andreıa Beatrıs Ana (Rýmynııa), 57 kg – Alına Akobııa (Ýkraına), 59 kg – Angelına Lysak (Ýkraına), 62 kg – Ana Paýla Gonzales (Kanada), 65 kg – Anastasııa Lavrenchýk (Ýkraına), 68 kg – Kýmba Larrok (Fransııa), 72 kg – Anastasııa Alpeeva (Ýkraına) jáne 76 kg – Aıperı Medetkyzy (Qyrǵyzstan).
Jarysty erkin kúres sheberleri qorytyndylady. Serbııaǵa attanǵan 10 balýanymyzdyń bireýi ǵana jeńis tuǵyryna kóterildi. Ol – Asyl Aıtaqyn. 61 kg salmaq dárejesinde kúsh synasqan jalyndy jas alǵashqy aınalymdarda moldovalyq Vadım Beregoı men ýkraınalyq Kamıl Kerımdi qapy qaldyrǵanymen, jartylaı fınalda armenııalyq Artem Harýtıýnıanǵa ese jiberdi. Odan keıin majarstandyq Gamzatgadjı Halıdovtan aılasyn asyrǵan Asyl álem chempıonatynyń qola júldegeri atandy.
Balqan túbeginde biz Qazaqstannyń ulttyq qurama komandasynyń múshesi, álem chempıonaty men Dúnıejúzilik áskerıler oıyndarynyń kúmis júldegeri, Azııanyń eki dúrkin chempıony Nurqoja Qaıpanovqa zor senim artqan edik. Biraq talaı dúrmekti kórgen beldi balýan Belgradta aıshyqty kúrese almady. 74 kg salmaqta beldesken Nurqoja jarysty óte jaqsy bastaǵanymen, ekinshi kezeńde armenııalyq Hraıar Alıkhanıannan utylyp, kórermender qataryna qosyldy.
Erkin kúreste de Reseı quramasyna teń keler komanda tabylmady. Olar 2 altyn, 3 kúmis jáne 1 qolany enshiledi. Ekinshi orynda – Ázerbaıjan. Qap taýynyń qyrandary 2 altyn men 1 qolany qanjyǵalaryna baılady. Sondaı-aq altyn tuǵyrǵa kóterilgender qatarynda Iran (1+2+5), Armenııanyń (1+1+3), Qyrǵyzstan men Grekııanyń (1+1+0) jáne AQSh pen Ýkraınanyń (1+0+1) jalyndy jastary bar.
Erkin kúresten álem chempıony atanǵan balýandar: 57 kg – Alıabbas Rzazade (Ázerbaıjan), 61kg – Artem Harýtıýnıan (Armenııa), 65 kg – Georgıos Pelıdıs (Grekııa), 70 kg – Ernazar Akmatalıev (Qyrǵyzstan), 74 kg – Chermen Valıev (Reseı), 79 kg – Magomed Magomaev (Reseı), 86 kg – Mýhamed Alıev (Ýkraına), 92 kg – Osman Nýrmagomedov (Ázerbaıjan) jáne 125 kg – Entonı Lavrense Kassıoppı (AQSh).
